Athugið þessi frétt er meira en 5 ára gömul.

10 mkr. í aðgerðir gegn mansali

24.02.2016 - 12:13
Mynd með færslu
Tvær konur voru frelsaðar úr íbúðarhúsi í Vík í Mýrdal í síðustu viku en málið er rannsakað sem mansal. Mynd: RÚV
Tíu milljónum króna á að verja til aðgerðaáætlunar gegn mansali. Þetta kemur fram í skriflegu svari innanríkisráðherra við fyrirspurn Jóhönnu Maríu Sigmundsdóttur alþingismanns. Átælunina samþykkti fyrri ríkisstjórn í apríl 2013 og á hún að standa út þetta ár.

Þegar hefur fjórum milljónum verið ráðstafað í stöðugildi vegna mansalsmála. Þeim sex milljónum sem eru afgangs verður varið í verkefni á þessu ári. Eitt þeirra er að setja verklagsreglur um vitnavernd. Fram kemur í svari ráðherra að undanfarin áratug hafi átt sér stað mikil þróun í vitnavernd hér á landi, bæði hafa lögin þróast og svo framkvæmdin.

Þá er stefnt er að því að auka vitund í samfélaginu um einkenni mansals. Þetta er meðal þess sem kemur fram í fjögurra ára samkomulagi ríkisstjórnarinnar og Rauða krossins. Einnig á að opna hjálparsíma samtakanna 1717 fyrir  þolendur mansals. Þá stendur til að þjálfa fólk innan réttarkerfisins og að auka samvinnu milli þeirra stofnana og samtaka sem vinna að aðgerðum gegn mansali.Verklagsreglur lögreglu eru í endurskoðun. Þá hefur verið settur á laggirnar þverfaglegur stýrihópur sem ætlað er að framfylgja aðgerðaráætlun stjórnvalda gegn mansali. Á þessu ári stendur til að stuðla að vitundarvakningu um mansal og birtingarmyndir þess með fræðslu bæði fyrir almenning og fagaðila.