Staðan í Grindavík er óbreytt og áfram eru taldar verulegar líkur á eldgosi. Hvar og hvenær er óvíst. Ljóst er að Grindavíkurbær er illa skemmdur eftir skjálftana á föstudag. Almannavarnir fóru yfir stöðuna í morgunsárið og þar varmeðal annars farið yfir hvort óhætt sé að hleypa fleiri Grindvíkingum að heimilum sínum að sækja nauðsynjar og fleira. Bogi Adolfsson formaður björgunarsveitarinnar Þorbjarnar ræddi við okkur um könnunarleiðangur sem hann var á leið í inn í Grindavíkurbæ.
Páll Erland, forstjóri HS Veitna, var gestur okkar hálf átta. Í gær var greint frá því að dreifikerfi HS Veitna væri laskað eftir skjálftahrinuna og gliðnunina, heitavatnslaust væri á hluta Grindavíkurbæjar og ólíklegt að hægt sé að ráðast í viðgerðir í bráð.
Mikil vinna hefur farið fram um helgina hjá sveitarfélögum til að tryggja grindvískum börnum skólavist. En hvar standa þau mál, mæta þau í leik- og grunnskóla þennan morguninn? Við ræðum við Eystein Þór Kristinsson, skólastjóra grunnskóla Grindavíkur.
Trausti Fannar Valsson, deildarforseti lagadeildar Háskóla Íslands, var gestur okkar eftir átta fréttir. Við ræddum lög um almannavarnir og lagalegan grundvöll rýmingar af því tagi sem við sáum í Grindavík um helgina.
Við heyrðum líka í Auðunni F. Kristinssyni verkefnastjóra á aðgerðasviði Landhelgisgæslunnar og framkvæmdastjóra siglingasviðs um viðbragðsstöðu gæslunnar og viðveru varðskipsins Þórs nærri Grindavík.
Íþróttirnar voruþrátt fyrir allt á sínum stað. Eva Björk Benediktsdóttir íþróttafréttamaður fór yfir þær.