Lifandi og fjölbreyttur þáttur um fréttir, menningu og dægurmál. Helstu fréttir dagsins eru krufðar og ljósi varpað á litríkt mannlíf um land allt. Umsjón: Sigríður Halldórsdóttir, Bergsteinn Sigurðsson, Guðrún Sóley Gestsdóttir og Urður Örlygsdóttir.
Faðir þriggja drengja á Egilsstöðum borgaði í fyrra yfir tvær milljónir króna í ferðakostnað vegna þátttöku sona hans á íþróttamótum í Reykjavík. Formaður Hattar segir kostnað farinn að valda misskiptingu í íþróttaiðkun, dæmi séu um heimili sem hafi ekki tök á að senda börn sín á mót. Umsóknir í jöfnunarsjóð ÍSÍ vegna ferðakostnaðar voru fimm sinnum meiri en til var í sjóðnum í fyrra. KSÍ sendi á dögunum áskorun til mennta- og barnamálaráðherra um aðgerðir. Við förum yfir stöðuna fyrir austan og ræðum við Willum Þór Þórsson, forseta ÍSÍ.
Að sitja með hendur í skauti og gera ekki neitt í klukkustund hljómar eins og létt verk en reynist mörgum erfitt á tímum síáreitis. Sumir eru þó farnir að nota þessa aðferð til að endurheimta athyglisgáfu og einbeitingu. Kastljós bað þrjá einstaklinga um að gera ekki neitt og segja frá hvernig gekk.
