Sakaður um að vantelja hálfan milljarð

Ingvar Vilhjálmsson var yfirmaður markaðsviðskipta Kaupþings.


  • Prenta
  • Senda frétt

Sérstakur saksóknari hefur ákært Ingvar Vilhjálmsson, fyrrverandi framkvæmdastjóra markaðsviðskipta hjá Kaupþingi, fyrir að telja ekki fram til skatts tæplega hálfan milljarð króna árið 2008.

Samkvæmt ákæru vantaldi Ingvar fjármagnstekjur upp á rúmar 498 milljónir vegna tólf framvirkra gjaldmiðlasamninga við Kaupþing sem voru á gjalddaga á fyrri hluta árs 2008. Þannig er hann sakaður um að hafa komið sér undan að greiða tæplega 50 milljónir króna í skatt. Ingvar var árið 2011 dæmdur til að greiða Kaupþingi 2,6 milljarða króna vegna lána til hlutabréfakaupa.

Þá hefur karlmaður á sextugsaldri verið ákærður fyrir að láta undir höfuð leggjast að telja fram rúmar 110 milljónir króna í fjármagnstekjur árin 2007 og 2008. Samkvæmt ákæru voru tekjurnar vegna 44 framvirkra gjaldmiðlasamninga við Glitni. Maðurinn er sakaður um að hafa þannig komið sér undan að greiða rúmar 11 milljónir króna í skatt.

Ertu með athugasemd vegna fréttarinnar? Sendu á frettir@ruv.is

Tilkynna um bilaða upptöku