Kjötiðnaðarnám undir hnífnum

06.01.2016 - 16:23
Mynd með færslu
 Mynd: nordlenska.is  -  Norðlenska
Báðum fagkennurum í kjötiðn við Hótel- og matvælaskólann hefur verið sagt upp. Formaður Meistarafélags kjötiðnaðarmanna segir þetta alvarlegt mál fyrir greinina.

 

Að sögn Halldórs J. Ragnarssonar formanns Meistarfélags kjötiðnaðarmanna er skýringin sem hann hefur fengið frá skólameistara MK þar sem Hótel- og veitingaskólinn er starfræktur sú að engir nemendur hafi skráð sig í námið á þessari önn og því telji skólinn sér ekki fært að halda úti tveimur starfsmönnum. Halldór segir annan starfsmannanna vera með 6 mánaða uppsagnarfrest og því ljóst að hann verði á launum fram á sumar. 

Hann segir að Matvælasamband hafi komið af fjöllum við þessi tíðindi. Þetta sé alvarleg staða fyrir greinina. Kennsla fari einnig fram hjá Verkmenntaskólanum á Akureyri, en aðastaða þar sé ekki nærri eins góð og í Kópavogi. Halldór segir að rætt verði við ráðuneytið og eins ætli Matvís að efna til fundar. Hann segist skilja skólameistara þannig að málið verði endurskoðað ef einhverjir skrá sig til náms. 

Halldór segir að endurskoða þurfi námskrána og hvort ástæða sé til að breyta henni. Hún sé byggð fyrir unglinga 16 ára og eldri, en það sé ekki hópurinn sem velti fyrir sér námi í kjötiðn, heldur frekar fólk sem vinnur í faginu og vill mennta sig í því. Síðustu 3 ár hafi að meðaltali verið 1,3 nemendur í námi í kjötiðn. 

Þá segir Halldór fulla ástæðu til að hafa meira eftirlit með því sem kallað er beint frá býli. Kjötiðn sé lögvernduð grein. Í lagi sé hins vegar í bæjarfélögum þar sem færri en hundað búa að vinna kjöt án aðkomu fagmanns, en eitthvað af því kjöti fari í framhaldinu á stærri markað eins og til Reykjavíkur. Lítið eftirlit sé með því. 

 

 

 

.

 

 


Deila frétt



Mynd með færslu
Haukur Holm
Fréttastofa RÚV
06.01.2016 - 16:23