Faðir forsætisráðherra ábyrgðist barnaníðing

14.09.2017 - 16:32
Benedikt Sveinsson, faðir Bjarna Benediktssonar forsætisráðherra, var einn þeirra sem skrifuðu undir meðmælabréf með uppreist æru Hjalta Sigurjóns Haukssonar. Hjalti fékk fimm og hálfs árs fangelsisdóm árið 2004 fyrir gróf og ítrekuð kynferðisbrot gegn stjúpdóttur sinni, sem þá var á aldrinum fimm til sautján ára. Benedikt biðst afsökunar á því að góðverk við dæmdan mann hafi snúist upp í framhald harmleiks brotaþola.

Benedikt staðfestir þetta í yfirlýsingu sem hann sendi fjölmiðlum eftir að bæði Stundin og Visir.is höfðu greint frá því að Benedikt hefði sett nafn sitt á meðmælandabréf Hjalta. Þar biður hann þá sem eiga um sárt að binda vegna máls Hjalta afsökunar á því að hafa ljáð honum atbeina við umsókn um uppreist æru.

Benedikt segir í yfirlýsingunni að Hjalti hafi leitað til sín um meðmæli vegna uppreistar æru. „Hann kom til mín með bréf, tilbúið til undirritunar,“ segir Benedikt. „Ég skrifaði undir bréfið og hef ekki vitað af málinu síðan, fyrr en það kom til opinberrar umfjöllunar nú í sumar.“

Benedikt segir að Hjalti hafi um tíma verið tengdur kunningjafólki hans og eiginkonu frá skólaárum. „Hann hefur í nokkur skipti leitað aðstoðar hjá mér, fyrst og fremst vegna fjárhagsmála eða í tengslum við atvinnuleit. Engin önnur tengsl hafa verið á milli okkar.“

Benedikt segist ekki hafa rætt meðmælabréfið við nokkurn mann, hvorki í stjórnkerfinu né annars staðar, og að hann hafi aldrei verið spurður frekar út í málið. „Allur aðdragandi og umbúnaður málsins var sá að verið væri að ganga frá formsatriði fyrir umsókn til stjórnsýslunnar.“

Benedikt fullyrðir í yfirlýsingu sinni að hann hafi aldrei litið svo á að uppreist æru væri annað en lagalegt úrræði fyrir dæmda brotamenn til að öðlast að nýju borgaraleg réttindi. „Sá hugur bjó ekki að baki að rétta stöðu Hjalta gagnvart fórnarlambi hans. Hjalta hef ég sagt að horfast í augu við gjörðir sínar og iðrast þeirra. Það sem átti hér að vera lítið góðverk við dæmdan mann hefur snúist upp í framhald harmleiks brotaþola. Á því biðst ég enn og aftur afsökunar.“

Benedikt segir enn fremur að hann muni ekki veita fjölmiðlum viðtöl vegna málsins. Þess er nú beðið að dómsmálaráðuneytið birti gögn um þá sem hlotið hafa uppreist æru frá árinu 1995. Ráðuneytið hefur þegar birt gögn sem varða mál Roberts Downey, áður Róberts Árna Hreiðarssonar, sem var dæmdur í fangelsi fyrir kynferðisbrot gegn fjórum ungum stúlkum. Ráðuneytið hafði hafnað því að birta þau gögn, en samkvæmt úrskurði Úrskurðarnefndar um upplýsingamál vegna kæru RÚV, var ráðuneytinu skylt að birta gögnin. 

Halldór Einarsson eða Henson, er einn þeirra sem skrifuðu undir meðmælandabréf fyrir Róbert. Hann harmaði það í viðtölum við Visir.is í gær og DV.is í dag. „Þetta er ömurlegt mál og mér finnst mjög sorglegt að hafa blandast inn í þennan harmleik. Ég er sjálfur faðir og mér finnst þetta bara harmleikur. Samúð mín er með því fólki sem varð fyrir þessu,“ sagði Halldór við Visir.is.

Yfirlýsingu Benedikts í heild má lesa hér.

 

Í ljósi alls þess sem fram hefur komið að undanförnu vil ég biðja þá sem um sárt eiga að binda vegna máls Hjalta Sigurjóns Haukssonar, afsökunar á því að hafa ljáð honum atbeina við umsókn um uppreist æru.

Hjalti Sigurjón Hauksson var um tíma tengdur kunningjafólki okkar hjóna frá skólaárum. Hann hefur í nokkur skipti leitað aðstoðar hjá mér, fyrst og fremst vegna fjárhagsmála eða í tengslum við atvinnuleit. Engin önnur tengsl hafa verið á milli okkar.

Á síðasta ári leitaði Hjalti til mín um meðmæli vegna uppreistar æru. Hann kom til mín með bréf, tilbúið til undirritunar. Ég skrifaði undir bréfið og hef ekki vitað af málinu síðan, fyrr en það kom til opinberrar umfjöllunar nú í sumar. Ég ræddi ekki meðmælabréfið við nokkurn mann, hvorki í stjórnkerfinu né annars staðar, og hef aldrei verið spurður frekar út í málið. Allur aðdragandi og umbúnaður málsins var sá að verið væri að ganga frá formsatriði fyrir umsókn til stjórnsýslunnar.

Ég hef aldrei litið svo á að uppreist æru væri annað en lagalegt úrræði fyrir dæmda brotamenn til að öðlast að nýju tiltekin borgaraleg réttindi. Sá hugur bjó ekki að baki að rétta stöðu Hjalta gagnvart fórnarlambi hans. Hjalta hef ég sagt að horfast í augu við gjörðir sínar og iðrast þeirra.

Það sem átti hér að vera lítið góðverk við dæmdan mann hefur snúist upp í framhald harmleiks brotaþola. Á því biðst ég enn og aftur afsökunar.

Benedikt Sveinsson

 

 

 

Freyr Gígja Gunnarsson
Fréttastofa RÚV
Mynd með færslu
Alma Ómarsdóttir
Fréttastofa RÚV