Staðfesta hvort átt hafi verið við kílómetrastöðuna
Bílaumboðið Askja telur sig geta staðfest hvort átt hafi verið við kílómetrastöðu bíla af þeim tegundum sem fyrirtækið flytur inn. Þeim sem eiga bíla frá umboðinu, sem áður voru í eigu Procar, býðst að láta kanna hvort kílómetrastöðunni hafi verið breytt.
Framkvæmdastjóri Öskju, Jón Trausti Ólafsson, segir hægt að bera saman gögn úr vélartölvu KIA og Mercedes Bens-bifreiða til að sannreyna upplýsingar í mælaborði bílanna.
Eins og fram kom í fréttaskýringaþættinum Kveik í kvöld er þegar staðfest eitt dæmi þess að upplýsingar frá Procar standist ekki, en eigandi KIA-bifreiðar gat sannreynt að mælirinn hefði verið færður niður, þótt Procar segði svo ekki vera.
„Við munum núna í framhaldi af þessu bjóða KIA-eigendum og Mercedes Bens-eigendum að koma til okkar þar sem við munum raunverulega lesa af bílnum og skoða hvort það sé misræmi í kílómetrastöðu á kílómetramæli bifreiðarinnar annars vegar og á vélartölvu bifreiðarinnar hins vegar,“ segir Jón Trausti.
Hafa svarað hátt í 500
Eigendum gamalla Procar-bíla hefur verið vísað á lögmannsstofuna Draupni til að fá staðfest hvort þeirra bíll hafi verið færður niður eða ekki.
Samkvæmt yfirlýsingu sem Draupnir sendi Kveik í dag hefur lögmannsstofan svarað hátt í 500 fyrirspurnum vegna Procar-málsins. Aðeins eitt tilvik hafi komið upp þar sem misræmi virðist í sölugögnum bíls og útleigusögu, það sem Kveikur fjallaði um í kvöld, og að það mál verði skoðað nánar.
Þá séu viðræður við óháðan aðila um mat á bótafjárhæð á lokametrunum og til standi að upplýsa bíleigendur um það ferli fyrir lok vikunnar.