RÚV okkar allra
Hér upplýsum við um starfsemina, bjóðum upp á samtal og svörum spurningum þínum

Umfjöllun RÚV fyrir Alþingiskosningar 2016

Mynd með færslu
RÚV mun kynna öll framboð sem hafa fengið úthlutað listabókstaf frá innanríkisráðuneytinu og eru tilbúin með framboðslista í minnst einu kjördæmi.

Framboðum, sem ekki hafa kynnt neina framboðslista þegar kosningaumfjöllun RÚV hefst, verður boðin þátttaka í umræðum RÚV um leið og fyrsti fullskipaði framboðslistinn liggur fyrir.

Kosningaumfjöllunin verður sem hér segir:

•             Kosningavefur RÚV.

•             2 umræðuþættir með leiðtogum stjórnmálaflokka

•             10 málefnaþættir í sjónvarpi með fulltrúum stjórnmálaflokka

•             Forystusætið – sjónvarpsviðtöl við formenn stjórnmálaflokka

•             Kjördæmafundir í útvarpi með oddvitum allra framboða

•             Málefnaumræða í útvarpi í ýmsum þáttum Rásar 1 og 2

•             Þriggja þátta röð á Rás 1 um stjórnmál á 21.öldinni

•             KrakkaRÚV mun halda úti kosningaumfjöllun fyrir yngri kynslóðina

•             Samfélagsmiðlar RÚV verða nýttir, m.a. Facebook og RÚV-snappið

•             Kosningavaka verðin haldin að kvöldi kjördags

RÚV býður framboðum auk þess frían útsendingartíma fyrir kynningarefni um stefnumál sín. Þetta er gert í samræmi við 7. tölulið 2. mgr. 3.gr. laga um Ríkisútvarpið nr. 23/2013. RÚV birtir reglur þar að lútandi. Kynningarefnið verður sýnt eftir að framboðsfrestur er runninn út. Kynningarefnið þarf að vera tilbúið og því skilað til RÚV eigi síðar en 10. október nk. Reglur þær sem gilda um útsendingu kynningarefnis fylgja hér í viðhengi.

RÚV kynnir því öll framboð í leiðtogaþætti í upphafi kosningarumfjöllunarinnar, með viðtölum við formenn (Forystusætið), í kjördæmaþáttum og með því að sýna kynningarefni þeirra. Framboðum sem bjóða fram á landsvísu er auk þess boðið í 5 málefnaþætti og lokaumræður í sjónvarpi. Framboðum, sem bjóða fram í færri kjördæmum er boðið í jafn marga málefnaþætti og fjölda þeirra kjördæma sem þeir bjóða fram í. Auk þess er þeim framboðum boðið í lokaumræður í miðlum RÚV en líkt og neðan greinir áskilur RÚV sér rétt til að skipta þeim umræðum.

Stefnt er að því að formleg kosningaumfjöllun hefjist með leiðtogaumræðum fimmtudaginn 22. september nk. Ráðgert er að málefnaumfjöllun hefjist þriðjudagskvöldið 27. september nk. og viðtöl við formenn viðkomandi framboða hefjist 3. október nk. og kjördæmafundir hefjist 10. október. Þá er gert ráð fyrir að leiðtogar allra framboða sem bjóða fram á landsvísu mætist í sjónvarpssal daginn fyrir kjördag, þann 28. október nk.

Fjallað verður um framboðin og kosningarnar í fréttatímum RÚV. Gætt verður að því að gera framboðum jafn hátt undir höfði en fréttamat gildir hverju sinni. Um aðgang framboða að fréttum RÚV gilda reglur um takmarkanir á þátttöku framboða til almennra kosninga í dagskrá RÚV. Þar segir m.a. að fréttastofa og aðrar dagskrárdeildir skuli forðast að leiða frambjóðendur fram í fréttum, fréttatengdum þáttum eða annars staðar í dagskrá eftir að framboðsfrestur rennur út og þar til kosningar eru um garð gengnar, nema sterk rök mæli með nauðsyn þess að viðkomandi komi fram, eða til viðkomandi sé vitnað vegna sérstakra atvika. Þetta á þó ekki við þegar um er að ræða sérstakar dagskrár eða fréttapistla sem samþykkt hafa verið í tilefni af kosningaundirbúningi.

Ríkisútvarpið áskilur sér rétt til þess, reynist fjöldi framboða mikill, að takmarka þann fjölda framboða sem mætast hverju sinni í viðtals- eða umræðuþáttum, líkt og gert var fyrir alþingiskosningarnar 2013 og forsetakosningarnar 2016. Til að mynda verður hvert málefni tekið fyrir í tveimur málefnaþáttum og helmingi framboða á landsvísu boðin þátttaka í sitt hvorum þættinum þar sem viðkomandi málefni er rætt. Nánari útfærsla á leiðtogaumræðum kvöldið fyrir kjördag  verður kynnt þegar fjöldi framboða liggur fyrir. Markmiðið með þessu er að stuðla að upplýstri umræðu í aðdraganda kosninga og skila áhorfendum meiru en umræður allra framboða á sama tíma í umræðuþætti myndu gera. Með þessari framkvæmd er meðal annars brugðist við ábendingum sem koma fram í skýrslu Öryggis- og samvinnustofnunar Evrópu (ÖSE) um framkvæmd alþingiskosninganna 2013. Í skýrslunni kemur m.a. fram að frambjóðendur og áhorfendur töldu að skort hefði á dýptina í umræðuþáttum með of mörgum þátttakendum.
Hér má finna skýrslu ÖSE frá 2013.

Rétt er að taka fram að ofangreint er háð því að boðað verði til kosninga 29. október nk.

Reglur um kynningarefni frambjóðenda í Alþingiskosningum 2016

Tæknilegar skilareglur RÚV vegna Alþingiskosninga 2016