„Við eigum að skammast okkar“

19.03.2017 - 13:00
Örorkubætur og lágmarkslaun hér á landi eru skammarleg, sagði Mikael Torfason í Silfrinu í dag en hann hefur undanfarna mánuði kynnt sér líf fátæks fólks á Íslandi. „Þetta er bara fólk sem við höfum skilið eftir á bótum sem eru skammarlegar. Og við viljum að þær séu skammarlegar, að þær séu lágar, því við viljum ná að kúga þetta fólk til að hætta þessu.“

Talsverð umræða hefur skapast um útvarpsþætti Mikaels, Fátækt fólk, sem eru á dagskrá Rásar 1 á laugardagsmorgnum. Hægt er að hlusta á þættina í Sarpinum eða sækja þá í hlaðvarpi RÚV.

Ríkur réttur til að græða á fátæku fólki

Mikael var mjög harðorður í garð ríkisstjórnarinnar, sem hann kallaði „ríkisstjórn atvinnulífsins“, og þá sérstaklega Þorsteins Víglundssonar, félagsmála- og jafnréttisráðherra. „Hann vill engin lög á leigufélög. Vegna þess að rétturinn til að græða á fátæku fólki er svo ríkur. Það er eignarréttur kvótakóngsins, sem græddi tvö þúsund milljónir í fyrra á því að leigja fátæku fólki sem hefur ekki efni á að kaupa sér íbúð,“ sagði Mikael. „Íslenskir kjósendur eiga líka bara að skammast sín, fyrir að kjósa verstu ríkisstjórn sem við höfum kosið.“

Búum ekki í sanngjörnu samfélagi

Í þáttunum fjallar Mikael ekki aðeins um fólk á bótum sem lifir við örbirgð, heldur einnig menntað fólk, eins og hjúkrunarfræðinga og kennara, sem fá laun sem, samkvæmt viðmiðum Velferðarráðuneytisins, duga alls ekki til að ná endum saman. „Við búum bara ekki í sanngjörnu samfélagi þegar 370 þúsund krónur eru byrjunarlaun hjúkrunarfræðings. Þegar fólk á að lifa á örorku, sem er 129 og 180 þúsund á mánuð. Þegar við leggjumst á koddann í kvöld, þá eigum við að skammast okkar,“ segir Mikael.

Mikael Torfason var gestur Egils Helgasonar í Silfrinu í dag. Viðtalið í heild má sjá hér fyrir ofan.