Vestri – nýtt íþróttafélag á Vestfjörðum

15.01.2016 - 11:19
Mynd með færslu
 Mynd: Einar Rafnsson  -  RÚV
Nýtt íþróttafélag Vestri verður stofnað í dag og ný stjórn kosin. Þessa helgi verður í fyrsta skiptið keppt undir merkjum félagsins sem verður til með sameiningu fimm íþróttafélaga á norðanverðum Vestfjörðum.

Undirbúningur að nýja félaginu hefur staðið í tæpt ár og verða Boltafélag Ísafjarðar, Sundfélagið Vestri á Ísafirði, Blakfélagið Skellur á Ísafirði, Körfuknattleiksfélag Ísafjarðar og knattspyrnudeild Ungmennfélagsins í Bolungarvík sett undir einn hatt. Hjalti Karlsson, formaður sameiningarnefndar segir margar hagræðingar felast í sameiningunni: „Það er ekki bara að allir eru að spila fyrir sama félag, undir sama merki í sama búning heldur er ýmis önnur hagræðing í viðskiptahlið málsins, aðföng, kaup á búningum, styrktarsamningar og ferðakostnaður, sem geta falist tækifæri í.“

Þessa helgi mun fyrsta liðið keppa undir merkjum nýstofnaðs félags, ungir knattspyrnustrákar. Öll félögin hafa samþykkt sameiningu á félagafundum og í dag verður ný stjórn kosin en ljóst er að sameiningin mun ekki ganga í gegn að fullu fyrr en fyrr en öll félögin hafa samþykkt sameininguna á sínum aðalfundum á vormánuðum og nýskipaðar stjórnar býður verðugt verk: „Það er eitt að stofna félag en svo er að ýta því úr vör með kröftugum hætti. Það felst meðal annars í því að það þarf að finna félaginu nýtt merki, nýja liti og nýja búninga. Það verður nóg að gera hjá nýrri stjórn.“

Mynd með færslu
Halla Ólafsdóttir
Fréttastofa RÚV