Tvö skip dýpka Landeyjahöfn

24.02.2016 - 18:16
Mynd með færslu
 Mynd: Samúel Örn Erlingsson  -  RÚV
Mynd með færslu
 Mynd: Samúel Örn Erlingsson  -  RÚV
Mynd með færslu
 Mynd: Samúel Örn Erlingsson  -  RÚV
Mynd með færslu
 Mynd: Samúel Örn Erlingsson  -  RÚV
Dýpkunarskipin Dísa og Galileo 2000 vinna nú að dýpkun Landeyjahafnar. Dísa kom í höfnina í gær og belgíska skipið Galileo í morgun. „Ef veður helst stillt gætu þau náð þessu á fjórum dögum“, segir Sigurður Áss Grétarsson framkvæmdastjóri Siglingasviðs Vegagerðarinnar. „Langtímaspáin vakti með okkur vonir um að Herjólfur gæti farið um höfnina uppúr helgi, en hún hefur nú breyst dálítið og við vitum ekki hvað verður“.

Sigurður Áss segir að skipin muni bæði vinna að þessu verkefni. Galileo 2000 kom til landsins fyrir skömmu. Það er í eigu belgíska fyrirtækisins Jan de Nuul sem sinnir dýpkun við höfnina á veturna næstu þrjú ár samkvæmt samningi eftir útboð. Íslensk skip munu dýpka á haustin og eftir því sem þurfa þykir. Á síðasta ári var dælt um 750 þúsund rúmmetrum af hafsbotni í og við höfnina fyrir um 520 milljónir króna, sem er meira en nokkru sinni.

Sigurður Áss segir að það sé misskilningur að Dísa hafi verið send í Landeyjahöfn til að dýpka höfnina svo Galileo kæmist þar inn. „Þau rista jafndjúpt, þó Galileo sé miklu stærra skip. Galileo mun dæla upp úr höfninni en Dísa vinna fyrir utan hana“. Sigurður segir að Belgarnir hafi ekki getað siglt skipinu til Vfestmannaeyja fyrr en í gær, en þar munu þeir hafa aðstöðu. "Þar þurftu þeir að koma fyrir búnaði og varahlutum, og byrjuðu svo að dæla úr höfninni í morgun“. Myndirnar að ofan voru teknar af dýpkun við hafnarmynnið í dag.

 


Deila frétt



Samúel Örn Erlingsson
Fréttastofa RÚV
24.02.2016 - 18:16