„Þvættingur, fyrirsláttur og pólitík“ - viðtal

07.01.2017 - 19:34
Mynd með færslu
 Mynd: RÚV
Bjarni Benediktsson, fjármálaráðherra, vísar því á bug að hann hafi setið á skýrslu starfshóps, sem hann skipaði, um eignir Íslendinga á aflandssvæðum fram yfir kosningar. Allt tal um slíkt sé þvættingur, fyrirsláttur og ekkert nema pólitík.

Starfshópur á vegum efnahags- og fjármálaráðuneytisins skilaði af sér skýrslu í október um eignir Íslendinga á aflandssvæðum. Þar er áætlað að íslenska ríkið verði af hátt í sex og hálfum milljarði árlega vegna vantalinna eigna Íslendinga í skattaskjólum og að uppsafnaðar eignir þeirra þeirra á aflandssvæðum hafi numið allt að 810 milljörðum króna í lok árs 2015.

Skýrslan var birt í gær, eða um þremur mánuðum eftir að henni var skilað í ráðuneyti Bjarna Benediktssonar. Hann minnir á að skýrslan hafi verið unnin að hans frumkvæði, hann hafi fengið hana í hendurnar eftir þingslit og því hafi verið ákveðið að bíða framyfir kosningar með birtingu hennar, svo ný ríkisstjórn og ný efnahags- og viðskiptanefnd gæti tekið hana til umfjöllunar.

Hér má horfa á allt viðtalið við Bjarna Benediktsson.

Ekkert sem þurfti nauðsynlega að koma fram fyrr

Í ljósi þess að Alþingiskosningum var flýtt eftir umfjöllun fjölmiðla um Panamaskjölin svokölluðu, þar sem meðal annars nafn Bjarna kom fyrir, spurði fréttastofa formann Sjálfstæðisflokksins, hvort ekki hafi hvílt rík skylda á honum að upplýsa almenning um innihald skýrslunnar fyrir kosningar. 

„Ég skal ekki segja. Það getur vel verið að einhverjum þyki það vera þannig. En þá segi ég bara að þetta var frá upphafi hugsað þannig að ég myndi skila málinu til efnahags- og viðskiptanefndar þingsins,“ segir Bjarni aðspurður. „Og ég sé ekki að það sé neitt í þessari skýrslu sem hægt er að benda á að hefði nauðsynlega þurft að koma fram einhverjum vikum fyrr. Aðalatriði er að þetta sé tekið saman til þess að byggja undir þessa málefnalegu umræðu sem við viljum taka um þessi mál.“

Pólitískir andstæðingar reyni að gera sér mat úr málinu

Bjarni fullyrðir að enginn ráðherra hafi beitt sér jafn mikið gegn skattaundanskotum og hann og segir að pólitískir andstæðingar sínir reyni nú að gera sér mat úr tímasetningu á birtingu skýrslunnar.

„Var það ekki reynt í aðdraganda þessara kosninga? Voru þessi mál ekki þaulrædd í aðdraganda þessara kosninga? Meðal annars í Ríkisútvarpinu með einhverjum skiltabirtingum daginn fyrir kosningar? Hversu mikið var ekki hamrað á aflandsfélagamálum, Panama-skjölum og öllu þessu? Vantaði eitthvað inn í þá umræðu? Er eitthvað í þessari skýrslu sem í sjálfu sér setur þau mál öll í eitthvert nýtt ljós? Þetta er auðvitað allt saman tómur þvættingur og fyrirsláttur og ekkert nema pólitík,“ segir hann í samtali við fréttastofu.

Ekkert hægt að fullyrða um möguleg áhrif á kosningarnar

Bjarni segir að enginn geti fullyrt neitt um það hvort birting skýrslunnar hefði einhverju breytt um úrslit Alþingiskosninganna. „Ég bara tók eftir því að Panama-skjöl og aflandsfélög voru rauður þráður í málflutningi margra flokka alveg fram á kjördag, og ég held að það hafi ekki farið framhjá neinum. Þannig að þeir hafa nú gert sér eins mikinn mat úr þessum málum eins og mögulegt var og uppskar svo í samræmi við það hvernig fólki líkaði, “ segir Bjarni.

Þá telur hann að gagnrýni á tímasetningu á birtingu skýrslunnar eigi ekki rétt á sér. „Nei, ég vísa því algjörlega á bug að henni hafi með einhverjum hætti verið haldið leyndri. Það bara er ekki þannig.“   

Katrín Jakobsdóttir, formaður Vinstri grænna og fulltrúi flokksins í efnahags- og viðskiptanefnd Alþingis, óskaði eftir því í dag að skýrsla starfshópsins um eignir Íslendinga í skattaskjólum verði tekin til umræðu í nefndinni eftir helgi.