Þjófstörtuðu konudeginum á Akureyri

Karlarnir tóku á móti konunum í morgun með ástarpungum og rjómapönnukökum og færðu þeim blóm og kertastjaka.

Að sögn Önnu Klöru Hilmarsdóttur, ritara hjá Norðurorku, er komin hefð fyrir því að karlmennirnir á vinnustaðnum dekri við samstarfskonur sínar í tilefni konudagsins. Þar sem konudagurinn er á sunnudegi þá var dekrið í dag.

Í tilefni dagsins setti Páll Jóhannson, starfsmaður Norðurorku, saman vísur sem konurnar fengu afhentar í morgun.

Við óskum þess auðmjúkir kallar

og uppfærum hérna í brag

að stelpurnar okkar allar

eigi nú blessaðan dag.

Atgervi ykkar við rómum

og yndisleika flesta daga.

Nú birtist það með blómum

og brauði í svanga maga.

Ertu með athugasemd vegna fréttarinnar? Sendu á frettir@ruv.is