Standard Chartered í nýju hneyksli
Standard Chartered. Mynd: AFP.
Bankinn Standard Chartered er sagður hafa þvætt allt að 250 milljarða Bandaríkjadala fyrir Írana, jafnvirði rúmlega 30 þúsund milljarða íslenskra króna. Peningaþvættið hefur verið stundað í nærri áratug að sögn fjármálaeftirlitsins í New York ríki.
Fjármálaeftirlitið segir að bankinn hafi falið um 60 þúsund leynilegar færslur fyrir íranskar fjármálastofnanir, sem hafi verið ólöglegar vegna efnahagsþvingana Bandaríkjanna gegn Íran.
Fjármálaeftirlitið hefur rannsakað bankann í níu mánuði og segir að bankinn hafi uppskorið hundruð milljóna dala fyrir þvættið. Fjármálaeftirlitið hefur hótað að afturkalla starfsleyfi Standard Chartered í Bandaríkjunum. Höfuðstöðvar bankans eru í Lundúnum. Að sögn BBC kemur mestur hagnaður bankans frá Asíu.
Ertu með athugasemd vegna fréttarinnar? Sendu á frettir@ruv.is
