Skelfilegt fyrir sýrlensku þjóðina

Fyrst birt: 09.02.2012 00:34, Síðast uppfært: 09.02.2012 05:06

Þúsundir hafa fallið fyrir hendi hersveita Sýrlandssstjórnar frá því mótmælin hófust. Miklar skemmdir hafa verið unnar á borginni Homs. Mynd: Nordic Photos/AFP/Youtube

Það hefur haft skelfileg áhrif fyrir sýrlensku þjóðina að Öryggisráð Sameinuðu þjóðanna kom sér ekki saman um ályktun vegna Sýrlands. Þetta sagði Ban Ki-moon, framkvæmdastjóri Sameinuðu þjóðanna, í kvöld.

Ban sagði að þetta hefði orðið sýrlenskum stjórnvöldum hvatning til að herða enn aðgerðir sínar gegn andstæðingum stjórnvalda.

Ban Ki-moon tilkynnti við sama tækifæri að Arababandalagið hygðist á ný senda eftirlitssveitir til Sýrlands. Sveitirnar voru kallaðar frá Sýrlandi vegna vaxandi ofbeldis. Ban sagði að forysta Arababandalagsins hefði óskað eftir því að öryggissveitirnar störfuðu á vegum hvort tveggja Arababandalagsins og Sameinuðu þjóðanna.

Ertu með athugasemd vegna fréttarinnar? Sendu á frettir@ruv.is

Til baka