RÚV fær upplýsingar um mál Roberts Downeys

12.09.2017 - 12:08
Mynd með færslu
 Mynd: Facebook
Úrskurðarnefnd um upplýsingamál hefur kveðið upp úrskurð vegna kæru fréttastofu RÚV sem kærði þá ákvörðun dómsmálaráðuneytis að synja beiðni hennar um aðgang að gögnum í máli Roberts Downeys. Fallist er á kröfu um aðgang að gögnunum, með ákveðnum takmörkunum.

Óskað var eftir aðgangi að afritum af gögnum sem Robert Downey, áður Róbert Árni Hreiðarsson, lagði fram með beiðni um uppreist æru. Dómsmálaráðuneytið lýsti því yfir að það myndi ekki birta nöfn þeirra sem vottuðu um góða hegðun Roberts þegar hann sótti um uppreist æru til ráðuneytisins í fyrra. Vottorð um góða hegðun frá tveimur „valinkunnum einstaklingum“ er skilyrði fyrir því að hægt sé að fá uppreist æru.

Fréttastofa RÚV kærði þessa ákvörðun dómsmálaráðuneytisins til úrskurðarnefndar um upplýsingamál. Í yfirlýsingu ráðuneytisins í kjölfar úrskurðarins segir:

Í samræmi við úrskurð nefndarinnar mun dómsmálaráðuneytið veita aðgang að bréfi umsækjanda þar sem sótt er um uppreist æru, að undanskildum upplýsingum um símanúmer umsækjanda. Einnig verður veittur aðgangur að bréfi umsækjanda þar sem hann ítrekar beiðni sína um uppreist æru ásamt tilkynningu Fangelsismálastofnunar ríkisins til umsækjanda þar sem tilkynnt er um veitingu reynslulausnar. Þá verður jafnframt veittur aðgangur að þremur vottorðum nafngreindra manna sem lögð voru fram sem fylgigögn með umsókninni. 

Úrskurðarnefndin fellst þó á sjónarmið dómsmálaráðuneytisins um að vottorðin hafi að geyma að „ákveðnu leyti upplýsingar um einkamálefni sem sanngjarnt er og eðlilegt að leynt fari samkvæmt 9. gr. upplýsingalaga, meðal annars um heilsufar umsækjanda.“ Dómsmálaráðuneytinu er þar af leiðandi „óheimilt að veita almenningi aðgang að þeim á grundvelli 1. málsl. 9. gr. upplýsingalaga. Með vísan til 3. mgr. 5. gr. upplýsingalaga nr. 140/2012 ber ráðuneytinu þó að veita aðgang að öðrum hlutum skjalsins.“

Dómsmálaráðuneytið mun bregðast við úrskurði nefndarinnar eins fljótt og unnt er í dag.