Rúður nötruðu þegar herþota flaug yfir

06.09.2017 - 13:44
Mynd með færslu
F-15 herþota við loftrýmisgæslu. Mynd úr safni.  Mynd: Fáfnir Árnason
Íbúar á Ströndum og á sunnanverðum Vestfjörðum hafa í morgun heyrt miklar drunur úr lofti. Hljóðin koma frá F-15C orrustuþotum bandarískrar flugsveitar sem er hér á landi við loftrýmisgæslu. Íbúi á Hólmavík segir að rúður hjá sér hafi nötrað þegar hávaðinn var hvað mestur.

Íbúar á Ströndum heyrðu mikinn hvell upp úr klukkan tíu í morgun. Hann heyrðist bæði á Hólmavík og í Drangsnesi. Eiríkur Valdimarsson á Hólmavík var í símanum þegar hávaðinn dundi yfir. Í fyrstu hélt hann að einhver hefði skellt hurð í húsinu mjög fast. „Rúðurnar nötruðu og ég hélt að þær myndu beinlínis brotna. Fólki var ansi brugðið.“ Hann segir að annar hvellur hafi heyrst skömmu fyrir hádegi, sem allir hafi tekið eftir í þorpinu.

Reynir Bergsveinsson á Króksfjarðarnesi hrökk við skömmu fyrir hádegi þegar hann heyrði miklar drunur. Hann ræddi við nokkra nágranna sína sem voru sammála um að sennilega væru hljóðin frá herþotum. Reynir segir þetta þó óvenjulegt: „Þetta hefur aldrei gerst áður þegar verndarenglarnir fljúga hér hjá.“ Svona hávaði hafi ekki áður fylgt yfirfluginu, segir Reynir en tekur fram að hann hafi ekki talið svo mikla ógn af Rússum gegnum tíðina að þurft hafi herþotur til að fylla hann öryggiskennd.

Sex bandarískar F-15C orrustuþotur komu til landsins 22. ágúst síðastliðinn til loftrýmisgæslu. Með þeim í för voru eldsneytisbirgðavélar. Þotur sveitarinnar voru á flugi yfir norðvestanverðu landinu. Samkvæmt upplýsingum frá Landhelgisgæslunni, sem kemur að verkefninu, eru flugvélarnar í löglegri hæð og hefur ekki verið flogið á hljóðhraða. Þó geti veðuraðstæður orðið til þess að hljóðin frá þeim heyrast víðar og meira en stundum áður.

Brynjólfur Þór Guðmundsson
Fréttastofa RÚV