Ríkissjóður geldur fyrir skerðingar

Eins og fram kom í skýrslu Rannsóknarnefndar lífeyrissjóðanna töpuðu lífeyrissjóðirnir um 480 milljörðum króna á hruninu. Í kjölfarið gripu margir sjóðir til þess ráðs að skerða greiðslur sínar til lífeyrisþega. Guðbjartur Hannesson, velferðarráðherra segir það hafa áhrif á ríkissjóð. Ef sjóðirnir tapa fjórðungi tekna sinna þá á taki ekkert annað en almannatryggingakerfið við og það borgi þjóðin með sköttum sínum. 

Vegna tekjutenginga hækkuðu sem sagt greiðslur Tryggingastofnunar til elli- og örorkulífeyrisþega í kjölfar þess að lífeyrissjóðirnir lækkuðu sínar greiðslur. Í einhverjum tilfellum nam hækkunin sömu krónutölu og skerðingin. Það á við þá sem fá minnst greitt úr lífeyrissjóði. Aðrir fá hluta af sinni skerðingu til baka frá Tryggingastofnun og síðan eru einhverjir sem fá ekkert bætt. Allt fer þetta eftir því hversu mikinn rétt hver og einn átti í sínum lífeyrissjóði. En niðurstaðan varð engu að síður að skerðing lífeyrissjóðanna, auk annarra þátta, þýddi aukin útgjöld hjá Tryggingastofnun. 

„Hækkunin milli 2010 og 2011 er um 23% á bótum frá Tryggingastofnun, þ.e. elli- og örorkulífeyri. Það er ekki bara hækkun sem við tókum ákvörðun um, milli 8 og 9% á öllum þessum bótaflokkum um mitt ár í fyrra. Þetta er líka vegna þess að það hefur orðið tekjufall hjá þessum hópum, sem þarna eru inni. Þeir hafa tapað sínum séreignasparnaði eða tekið hann út. Þeir hafa lækkað fjármagnstekjur o.s.frv. og þá virkar kerfið nákvæmlega eins og það á að gera. Það tekur utan um þetta fólk og hjálpar því að tryggja ákveðna lágmarks framfærslu,“ segir Guðbjartur. 

Ertu með athugasemd vegna fréttarinnar? Sendu á frettir@ruv.is