Raforkunotkun á mann mest á Íslandi

20.03.2016 - 19:03
Mynd með færslu
 Mynd: Landinn  -  ruv
Raforkunotkun á mann er sú mesta í heiminum á Íslandi og hefur aukist á síðustu árum vegna stóriðju. Ný spá um raforkunotkun er komin út og nær til ársins 2050, þar er því spáð að notkun forgangsorku hafi aukist um 100 prósent í lok spátímans.

Sverrir Jan Norðfjörð, framkvæmdastjóri þróunar og tæknisviðs Landsnets, fór fyrir þeim sem gerðu spána. Hlutur stóriðjunnar var um helmingur af landsnotkun fyrir 25 árum en var í hittiðfyrra 21 prósent og verður 31 prósent í lok spátímans miðað við núverandi samninga. „Þessi raforkuspá, hún í rauninni nær ekki til þessa stóru einskiptisaukningar ef við getum kallað það. Þarna getur kannski komið einhver starfsemi sem er á við heilt bæjarfélag þess vegna,“ segir hann.

Til dæmis jók Fjarðaál á sínum tíma úttekt frá flutningskerfinu um 5 terawattstundir. 

Almenn heimilisnotkun önnur en rafhitun náði hámarki árið 2009 og var þá 4,9 megawattstundir á heimili. Hún hefur minnkað jafnt og þétt síðan og var í hittiðfyrra 4,5 MW/heimili. Munar þar mestu um breytingar í lýsingu, það er sparperurnar. Heimilistækjum hefur fjölgað en þau eru sparneytnari en þau voru og flest ný tæki orkugrönn. Því er spáð að notkun á heimili fari niður í 4 MW en verði ekki minni. Þá dragi úr raforkunotkun í landbúnaði þegar breytingar í lýsingu ryðji sér til rúms í garðyrkju eftir nokkur ár. 

Raforkunotkun í atvinnustarfsemi annarri en stóriðju jókst um 24 prósent frá 2009 til 2014. Fiskimjölsverksmiðjur vega þar þungt. Því er spáð að raforka verði nýtt í samgöngum í mjög vaxandi mæli og að flestir nýir fólksbílar verði knúnir rafmagni, beint eða óbeint.

„Þarna erum við í raun og veru að tala um að fara úr jarðefnaeldsneytinu yfir í rafmagn eða eru tengdir við rafmagn á einhvern hátt,“ segir Sverrir.

Síðast kom út slík spá, sem gerð er af fulltrúum Landsnets, Orkustofnunar, Norðurorku, Veitna, Rariks og Samorku, fyrir sex árum. 


Deila frétt



Anna Kristín Jónsdóttir
Fréttastofa RÚV
20.03.2016 - 19:03