ruv.is

Ólafur Ragnar Grímsson, forseti Íslands, var í viðtali hjá Rás fimm í Breska ríkisútvarpinu, BBC 5 Radio, í morgun en viðtalið var tekið í hljóðstofu í Útvarpshúsinu í Efstaleiti.

Ólafur veitir erlendum fjölmiðlum um 20 viðtöl um helgina vegna þjóðaratkvæðagreiðslunnar um Icesave. Þar á meðal CNN, Bloomberg og Nikkei dagblaðinu í Japan.

Ólafur segir í viðtali við fréttastofu RÚV að það sé ánægjulegt að sjá hvernig viðbrögðin séu að breytast. Fréttamenn séu  farnir að flytja málsstað Íslendinga. Spurningar sem hafi verið mjög harðar og gagnrýnar hafi vikið en nú skilji menn málstað Íslands; að kröfur Breta og Hollendinga séu ósanngjarnar.

Ekki sé deilt um hvort Íslendingar borgi lágmarksinnistæðuna, rúmlega 20 þúsund evrur fyrir hvern reikning, heldur um þann hagnað sem Bretar og Hollendingar vilji fá í sinn hlut. Hann hafi reiknað það út að hagnaðarkrafan í síðasta tilboðinu jafngildi því að um væri að ræða yfir 90 milljarða punda í Bretlandi miðað við höfðatölu eða yfir 27 milljarða evra í Hollandi. Þegar fréttamenn heyri þessar tölur hrökkvi þeir í kút og finnist þetta hrikalega ósanngjörn krafa.

Ólafur vill ekki tjá sig um ákvörðun Jóhönnu Sigurðardóttur forsætisráðherra að sitja heima. Aðspurður um fullyrðingar Jóhönnu um að atkvæðagreiðslan sé markleysa, bendir Ólafur á að lögin um Icesave-samninginn hafi tekið gildi. Ekkert frumvarp hafi verið lagt fram um að fella hann úr gildi. Samkvæmt íslenskri stjórnskipun sé það þátttaka fólksins í dag og niðurstaðan sem ráði því hvort lögin  taka gildi. Því geti þetta ekki verið marklaus athöfn.

Hann telur að synjun sín á Icesave lögunum eigi eftir að leiða til þess að lausn finnist sem allir geti við unað. Ólafur segir að þetta eigi að vera gleðidagur. Þjóðaratkvæðagreiðsla sé sterkasti vitnisburðurinn um lýðræði og í raun lýðræðishátíð.

Hér má hlusta á viðtal Björns Malmquists við Ólaf Ragnar í morgun.

frettir@ruv.is