Norðmenn óttast íslenska áfengisfrumvarpið

28.02.2017 - 11:06
Mynd með færslu
 Mynd: Anton Brink  -  Ruv.is
Verði áfengisfrumvarpið samþykkt á Alþingi gæti það sett pressu á norsk stjórnvöld að hætta ríkiseinokun á áfengi. Þetta segir Bent Høie, heilbrigðisráðherra Noregs.

Høie hefur þungar áhyggjur af því að bæði íslensk og finnsk stjórnvöld hafi það í flimtingum að slaka á áfengislöggjöfinni, en frumvarp sem heimilar sölu á léttvíni og bjór í matvöruverslunum liggur fyrir á Alþingi. Í Finnlandi eru einnig blikur á lofti.  Á næsta ári verður matvöruverslunum leyfilegt að selja bjór og léttvín með að hámarki 5,5% styrkleika. Þá munu veitingastaðir og krár geta selt viðskiptavinum sínum áfengi sem þeir geta tekið með sér heim. 

Norðurlöndin hafa staðið saman

Høie óttast að verði áfengisfrumvarpið svokallaða samþykkt á Alþingi Íslendinga, setji það pressu á norsk stjórnvöld að leyfa einkasölu áfengis í Noregi. 

„Það er auðvitað undir þessum þjóðum komið að ákveða hvernig þetta fer," segir Høie í samtali við miðilinn Vårt Land. „En það er nú einu sinni þannig að Norðurlöndin, fyrir utan Danmörku, hafa staðið saman í því að láta ríkið sjá um alla verslun á áfengi. Þessar fyrirhuguðu breytingar í Finnlandi koma til með að breyta þessu," segir Høie .

Strangasta löggjöfin á Íslandi 

Einokunarmarkaðir á áfengissölu eru í fimm af sex Norðurlöndum. Aðeins í Danmörku er áfengi selt á almennum smásölumarkaði. Þá hafa ríkisverslanir allar einkaleyfi á áfengi með misströngum reglum.  Vinmonopolet í Noregi selur áfengi sterkara en 4,7%.  Áfengir drykkir með lægri áfengisprósentu eru seldir í almennum matvöruverslunum. Til samanburðar fer ÁTVR með alla sölu á áfengi sterkara en 2,25% á Íslandi. Í Svíþjóð selur Systembolaget áfengi yfir 2,25% en bjór sem er sterkari en 3,5%. 

Þverstæðukennd þróun

Høie telur það þverstæðukennt að á meðan önnur evrópsk ríki séu að færa sig í áttina að norænni fyrirmynd þar sem áfengissala færist í auknum mæli í hendur ríkisins, séu tvö Norðurlandanna að færast í öfuga átt. Þá segist Høie ætla að ræða málin við heilbrigðisráðherra Norðurlandanna á ráðherrafundinum í maí. 

Mynd með færslu
Guðmundur Björn Þorbjörnsson
Fréttastofa RÚV