Minnihlutinn klofinn í Mýrdalshreppi

21.01.2016 - 19:34
Mynd með færslu
 Mynd: Samúel Örn Erlngsson  -  RÚV
Mynd með færslu
 Mynd: Sighvatur Jónsson  -  RÚV
Eiríkur Tryggvi Ástþórsson sveitarstjórnarmaður M-lista í Mýrdalshreppi lýsti því yfir á sveitarstjórnarfundi í Vík síðdegis, að hann myndi starfa utan lista það sem eftir væri kjörtímabils. M-listi Mýrdælinga átti tvo fulltrúa í sveitarstjórn. B-listi framfarasinna hefur þrjá menn og myndar meirihluta í sveitarstjórninni. Því má segja að minnihlutinn hafi klofnað.

Eiríkur Tryggvi sagði í samtali við Fréttastofu að ástæða úrsagnar hans úr M-listanum sé málefnaágreiningur. „Í M-listanum kom saman fólk úr öllum áttum og ekkert óeðlilegt að skoðanir séu skiptar. Ég stend áfram fyrir það sem ég var kosinn og mun styðja góð mál“, segir hann. Inntur eftir því hvaða mál væri helst um að ræða nefnir Eiríkur Dyrhólaey. „Það féll dómur í Hæstarétti um eignarhald á Dyrhólaey og ég lít svo á að því máli sé þar með lokið. En það eru ekki allir sammála um það“.

Eva Dögg Þorsteinsdóttir oddviti M-lista kannaðist ekki við neinn málefnaágreining í samtali við Fréttastofu. Hún segist vissulega hafa orðið fyrir vonbrigðum með dóminn um eignarhald Dyrhólaeyjar. Hún eigi aðild að málinu og hann hafi fallið sér og sínum í óhag. Dómur sé fallinn í Hæstarétti, ekkert sé frekar um það mál að segja. „Eiríkur Tryggvi hefur ekki tilkynnt M-listanum sérstaklega úrsögn sína. Hann kom bara með þessa yfirlýsingu í dag“, segir Eva Dögg.


Deila frétt



Samúel Örn Erlingsson
Fréttastofa RÚV
21.01.2016 - 19:34