Malí vann bronsið í Afríkukeppninni
Fyrst birt: 12.02.2012 06:24, Síðast uppfært: 12.02.2012 06:36
Leikmenn Malí bronsverðlaunahafar í Afríkukeppninni 2012
Malí sigraði Gana í leik um þriðja sæti í Afríkukeppninni í knattspyrnu í gær. Áður hafði Malí tapað fyrir Fílabeinsströndinni í undanúrslitum keppninnar og Gana fyrir Sambíu.
Cheick Diabaté, leikmaður franska liðsins Bordeaux, kom Malí í 1-0 eftir rúmlega tuttugu mínútna leik og var staðan þannig í leikhléi. Diabaté skoraði aftur þegar um tíu mínútur voru til leiksloka og gulltryggði 2-0 sigur Malí.
Þetta er besti árangur Malí í keppninni í 40 ár eða síðan liðið hafnaði í öðru sæti 1972.
Fílabeinsströndin og Sambía mætast í úrslitaleik um Afríkumeistaratitilinn í dag.
Ertu með athugasemd vegna fréttarinnar? Sendu á frettir@ruv.is
Tilkynna um bilaða upptöku
