Makríll í grænlenskri lögsögu
Stjórnvöld telja það skaða hagsmuni Íslendinga að leyfa löndun makríls úr grænlenskri lögsögu. Grænlendingar gætu krafist aðildar að makríldeilunni með því að óska eftir viðurkenningu sem strandríki.
Skiptar skoðanir eru um hvaða áhrif það hefur á samningaviðræður um makrílveiðar að stofninn sé farinn að ganga í grænlenska lögsögu. Sumir segja það flækja deiluna en aðrir telja það styrkja stöðu Íslands.
Makríldeila Íslands, Noregs og Evrópusambandsins hefur verið í hörðum hnút í nokkur ár og enn er ekki ljóst hvernig þeim tekst að semja um hlutdeild hvers ríkis í makrílstofninum. Á sama tíma eru útgefnar veiðiheimildir 45% umfram ráðgjöf, og því blasir mikil ofveiði við.
Grænland krefjist viðurkenningar ESB
Nú er makríllinn farinn að ganga inn í grænlenska lögsögu er búist við að Grænlendingar krefjist viðurkenningar Evrópusambandsins sem strandríki vegna makrílveiðanna, líkt og Íslendingar fengu fyrir tveimur árum eftir langa baráttu.
Stjórnvöld hafa hins vegar gefið út reglugerð þess efnis að veiðar á makríl í lögsögu annarra ríkja séu óheimilar nema samningar liggi fyrir um nýtingu. Skiptar skoðanir eru um hvaða áhrif þetta hefur á baráttu Íslands fyrir auknum makrílkvóta, meðal annars innan útgerðarinnar.
Hegðun makrílsins að breytast
Sumir telja að makrílgengd í grænlenska lögsögu styðji það sjónarmið Íslands að hegðun makrílsins sé að breytast. Íslendingar geti þá krafist stærri hlutar í kvótanum og því sé rétt að leyfa þessa löndun. Aðrir telja hins vegar ekki ástæðu til að aðstoða Grænlendinga við að krefjast hlutdeildar í makrílnum með því að leyfa þessa löndun, það gæti rýrt mögulegan hlut Íslands.
Þá kemur fram í bréfi Steingríms J. Sigfússonar sjávarútvegsráðherra til grænlenskra stjórnvalda að ef slík löndun yrði leyfð muni Evrópusambandið og Norðmenn skrá þá veiði á Íslendinga og saka þá um ofveiði og það skaði hagsmuni Íslands.
Næsti fundur í makríldeilunni er áætlaður í byrjun næsta mánaðar.
Ertu með athugasemd vegna fréttarinnar? Sendu á frettir@ruv.is
