Líffæraverslun í Kósóvó-stríðinu
Fyrst birt: 09.09.2012 15:49, Síðast uppfært: 09.09.2012 17:42
Hermaður Frelsishers Kósóvó 1998. Mynd: AFP.
Fyrrverandi uppreisnarmaður úr frelsisher Kósóvó hefur greint frá því að hann hafi tekið þátt í því að fjarlægja hjarta úr serbneskum fanga á meðan á Kósóvó-stríðinu stóð á tíunda áratugnum. Hjartað og fleiri líffæri sem voru fjarlægð voru svo seld á svörtum markaði.
Vladimir Vukcevic, saksóknari stríðsglæpa í Serbíu, segir vitnisburð mannsins afar áreiðanlegan, málið hafi verið rannsakað í um ár. Hann segir að líffæri hafi einnig verið fjarlægð úr Serbum sem var rænt á átakatíma. Saksóknarinn vildi ekki gefa nánari upplýsingar um málið og sagði ekkert um það hvort fólkið hafði verið myrt í þeim tilgangi að ná úr þeim líffærunum.
Ertu með athugasemd vegna fréttarinnar? Sendu á frettir@ruv.is
