Leggja til víðtækari verndun

Fjölmörg félagasamtök, fyrirtæki og einstaklingar hafa skilað inn umsögn um tillögu að þingsályktun um vernd og nýtingu náttúrusvæða á Íslandi. Í drögunum eru 68 vatnsafls- og jarðhitasvæði á Íslandi flokkuð í nýtingar-, bið- eða verndarflokk. Iðnaðar- og umhverfisráðherra munu á næstu dögum leggja fram þingsályktunartillögu

Þrettán náttúruverndarsamtök á Íslandi skiluðu inn sameiginlegri umsögn um tillöguna sem var kynnt á opnum fundi í Þjóðminjasafninu í dag. Hún felur í sér víðtækar breytingar. Samtökin leggja til í umsögn sinni að hægar verði farið í frekari orkuuppbyggingu með  jarðvarma og vatnsafli og fleiri svæðum hlíft en tillögudrögin gera ráð fyrir.

„Þetta eru ansi víðtækar breytingar. Við viljum í rauninni hreinsa hálendið af virkjanaframkvæmdum og fá rosalega mikið í burt,“ segir Rannveig Magnúsdóttir, ristjóri umsagnarinnar. Samtökin leggja meðal annars til að stofnaður verði þjóðgarður á miðhálendi Íslands. En sú hugmynd felur í sér að flokka þyrfti Skrokköldu og Hágöngur í verndunarflokk. Þá er lagt til að stofnaður verði eldfjallaþjóðgarður á Reykjanesskaga.

Ennfremur leggja samtökin til í umsögn sinni að Jökulsárnar í Skagafirði og náttúrusvæði í Skaftárhreppi fari í verndarflokk. „Við teljum bara að það sé ekki þörf á þessari orku. Það er bara 80% af þessari orku ætluð í stóriðju og við viljum bara ekkert meiri stóriðju, við erum með nóg fyrir okkur sjálf,“ segir Rannveig. Þá telja samtökin að frekari rannsókna á áhrifum jarðvarmavirkjana sé þörf áður en ráðist sé í fleiri virkjanir af þeirri gerð.

Samtökin telja að með verndun þeirra svæða sem þau tiltaka sérstaklega í umsögninni felist ótal tækifæri, meðal annars í sjálfbærri ferðaþjónustu. Þá ýti verndun undir aukin lífsgæði.

Ertu með athugasemd vegna fréttarinnar? Sendu á frettir@ruv.is