Krem við skordýrabiti seldist upp í Hveragerði

19.06.2017 - 17:01
Mynd með færslu
 Mynd: hveragerdi.is
Kláðastillandi krem seldist upp í apótekinu í Hveragerði á nokkrum klukkustundum á föstudag og skordýrafælur kláruðust líka. Þetta segir lyfsalinn í Hveragerði. Skordýrafræðingur telur að líklegt að sökudólgurinn sé bitmý eða flær. Veðuraðstæður að undanförnu hafi góð áhrif á allt lífríkið, nema þá sem ekki þoli bit.

Umræða um skordýrabit skapaðist í Facebook-hópi Hvergerðinga í liðinni viku. Þar var meðal annars tekið dæmi um barn sem vaknaði útbitið og útlits eins og það væri komið með hlaupabólu. Fleiri kvörtuðu undan biti og birtu myndir bæði af bitum og flugum. 

„Skordýrafælur og það sem er notað á flugna- og mýbit seldist upp fyrir helgi,“ segir Þorgils Baldursson, lyfjafræðingur og lyfsöluhafi Apótekarans í Hveragerði. Fólk verði yfirleitt ekki vart við bitið strax, ekki fyrr en fer að bera á kláða og óþægindum. 

Lúsmý sést ekki með berum augum

Erling Ólafsson skordýrafræðingur hafði ekki heyrt af auknu skordýrabiti á Suðurlandi þegar fréttastofa náði tali af honum síðdegis. Veðurfarið að undanförnu hafi góð áhrif á allt lífríki; vætutíð og sól á milli. „Veðuraðstæðurnar að undanförnu hafa verið góðar fyrir alla nema þá sem þola ekki bit,“ segir hann. Mikil sól fari illa í mýið. 
Bitvargarnir séu ekki margir sem komi til greina og það sé sennilega bitmý eða flær sem hafi verið að hrjá Hvergerðinga. Lúsmý sjáist ekki með berum augum og þekkist á því. „Lúsmý er eitthvað farið að bíta en ég veit ekki hversu mikið eða hversu víða,“ segir Erling. Líftími flóa sé frá apríl og fram í júní. „Hún á þennan tíma, svo drepst hún og uppvaxtarskeið lirfanna hefst fram á haustið.“

Lagerinn kláraðist

Apótekarinn er eina apótekið í Hveragerði en á Selfossi eru tvö. „Við fáum mikið af ferðafólki og það voru ekki síður útlendingar en Íslendingar að biðja um þetta,“ segir Þorgils. 

„Mildison krem, sem er vægur húðsteri, seldist upp á nokkrum klukkutímum á föstudag og Afterbite-penni sem notaður er til að taka mesta kláðann af biti, rauk út fyrir helgi,“ segir Þorgils. „Við vorum með rúmlega venjulegan lager og ég á von á lager í fyrramálið.“

Ásrún Brynja Ingvarsdóttir
Fréttastofa RÚV