Kæru vísað frá
Leik Hauka og Njarðvíkur hefur verið frestað vegna kærunnar
Körfuknattleiksdeild Keflavíkur kærði í gær framkvæmd leik liðsins gegn Njarðvík í átta liða úrslitum bikarkeppni kvenna sem fram fór um þarsíðustu helgi í Njarðvík sem vann leikinn, 78-72. Kærunni var vísað frá vegna formgalla.
Keflvíkingum þótti brotið á sér eftir tapið gegn grönnum sínum og töldu mistök hafa átt sér stað á ritaraborðinu meðan á leiknum stóð. Þeir lögðu því í gær inn kæru sem Aga- og úrskurðarnefnd Körfuknattleikssambandsins tók fyrir í gær. Þar var kærunni vísað frá vegna formgalla á henni, en Keflvíkingur hafa þrjá sólarhringa til þess að skila inn nýrri og endurbættri kæru. Á meðan kæruferlið stendur yfir er ekki hægt að setja á leik Njarðvíkur og Hauka í undanúrslitunum sem fyrirhugaður var um næstu helgi og honum hefur því verið frestað.
Ertu með athugasemd vegna fréttarinnar? Sendu á frettir@ruv.is
Tilkynna um bilaða upptöku
