Jón Daníelsson fær stóran styrk
Jóni Daníelssyni, prófessor við London School of Economics, og Jean-Pierre Zigrand, starfsbróður hans við skólann, var í gær veittur 5 miljóna punda styrkur til að koma á fót rannsóknamiðstöð um kerfisáhættu í fjármálakerfinu.
Styrkupphæðin samsvarar rúmum miljarði króna. Það var Breska hagfræði- og félagsvísindaráðið sem veitti styrkinn en hugmynd þeirra Jóns og Zigrand var ein af átta sem hlaut styrk. Jón segir í samtali við Morgunblaðið í dag að stefnt sé að því að miðstöðin verði leiðandi á sínu sviði. Á meðal helstu samstarfsaðila verði Evrópski seðlabankinn, Englandsbanki og breska fjármálaeftirlitið. Að auki verði tugir sérfræðinga við þekktustu háskóla heims í samstarfi við hana. Jón reiknar með að um 10 manns starfi við miðstöðina.