Jarðhræringar í Heklu: Óvissustig í gildi

26.03.2013 - 11:21
Hamfarir · Innlent · Hekla
Mynd með færslu
Ríkislögreglustjórinn og lögreglustjórinn á Hvolsvelli lýsa yfir óvissustigi almannavarna vegna jarðhræringa í Heklu. Þetta kemur fram í tilkynningu frá almannavarnadeild Ríkislögreglustjóra.

Veðurstofan hækkaði eftirlitsstig Heklu í gult vegna flugumferðar, sem þýðir að eldfjallið sýnir óvenjulega virkni. Óvissustig almannavarna þýðir að aukið eftirlit er haft með atburðarás sem á síðari stigum gæti leitt til þess að heilsu og öryggi fólks, umhverfis eða byggðar verði ógnað.

Að lýsa yfir óvissustigi er hluti af verkferlum í skipulagi almannavarna til að tryggja formleg samskipti og upplýsingagjöf. Óvissustigi er lýst yfir til þess að upplýsa viðeigandi viðbragðsaðila og er ákveðið ferli í skipulagi almannavarna og það lægsta af þrem.

Í ljósi þessa vilja ríkislögreglustjórinn og lögreglustjórinn á Hvolsvelli vara við ferðum fólks á Heklu á meðan óvissustig er í gildi.