Ísland að breytast í innflytjendaþjóð

08.01.2016 - 15:37
Framkvæmdastjóri Samtaka atvinnulífsins segir að á næstu árum breytist Ísland í innflytjendaþjóð. Eftir tiltölulega skamman tíma verði útlendingar um fimmtungur þjóðarinnar. Fyrirsjáanlegur sé skortur á vinnuafli sem kalli á að hingað komi tvö til þrjú þúsund útlendingar til starfa á ári.

Það er óhætt að fullyrða að samsetning íslensku þjóðarinnar er að breytast og muni breytast mikið á næstu árum. Þetta á við um aldurssamsetninguna. Öldruðum eða þeim sem eru 70 ára og eldri á eftir að fjölga ört. Árgangar sem komu í heiminn eftir seinni heimsstyrjöldina eru nú að komast á þennan aldur. Þessir árgangar eru mjög svipaðir að stærð og þeir árgangar sem nú eru að fæðast og líka þeirra sem eru að stíga sín fyrstu spor á vinnumarkaði. 70 ára og eldri er nú um 10% þjóðarinnar en nú er því spáð að hlutfallið hækki hratt og verði komið í 20 prósent um 2050. Evrópubúar glíma við þennan vanda ef svo má komast að orði. Þar er því spáð útgjöld til heilbrigðismála aukist vegna aldraðra um 2,5 prósent af landsframleiðslu á næstu 15 árum. Sé þetta heimfært á Ísland jafngildir þetta árlega 40 til 60 milljarða króna aukningu ríkisútgjalda

2000 til 3000 manns á ári

Vegna fjölgunar aldraðar mun vinnufæru fólki hlutfallslega fækka. Og vegna mikils hagvaxtar á næstu árum er fyrirsjáanlegt að það mun skorta vinnuafl hér á Íslandi.

„Ef við horfum til tiltölulega hóflegs hagvaxtar á næstu árum, til dæmis 2,5%, þá er að óbreyttu ljóst að okkur muni vanta um 2000 manns inn á vinnumarkaðinn á ári. Það þýðir að við þurfum að flytja inn starfsfólk í stórum stíl miðað við það sem við höfum áður þekkt," segir Þorsteinn.

Ísland að breytast í innflytjendaþjóð

En þó að ellilífeyrisaldurinn verði hækkaður og menn ljúki skólagöngunni fyrr mun það ekki duga til. Skortur á vinnuafli er fyrirsjáanlegur. Þorsteinn Víglundsson sagði á blaðamannafundi SA í gær að við yrðum að búa okkur undir það að Ísland breytist í innflytjendaþjóð á skömmum tíma. Horfur væru á því að eftir ekki svo ýkja mörg ár yrði fimmtungur þjóðarinnar af erlendu bergi brotin. Þetta hlutfall var á síðasta ári um átta af hundraði.

„Það er alveg ljóst að ef við erum að fara að flytja inn tvö eða jafnvel þrjú þúsund manns á ári mun þetta hlutfall breytast mjög hratt. Gæti verið 15% strax árið 2030. Ég held að við verðum að horfa til þessa með jákvæðum hætti um hvernig við munum takast á við þetta. Hvernig við auðveldum fólki, sem kemur hingað, að setjast að. Og þá hvernig við þróum okkar innflytjendastefnu til að mæta þessum veruleika,“ segir Þorsteinn Víglundsson.

 


Deila frétt



Mynd með færslu
Arnar Páll Hauksson
Fréttastofa RÚV
Spegillinn
Þessi þáttur er í hlaðvarpi
08.01.2016 - 15:37