Icelandic í dómsmál við Aldi

Mynd með færslu
Íslenski matvælaframleiðandinn Icelandic Group hefur fengið samþykkta lögbannskröfu á sölu fiskrétta í verslunarkeðjunni Aldi í Bretlandi.

Ástæðan er sú að þeir réttir sem seldir eru í breskum Aldi verslunum eru keimlíkir réttum sem Icelandic hefur selt í fjölmörgum verslunum í Bretlandi síðan árið 2011. Um er að ræða vörulínu frá Icelandic sem kallast „The Saucy Fish," sem í stuttu máli vakúmpakkaður fiskur með sósu innpakkaðri sem meðlæti.

Fyrir skömmu hóf Aldi sölu á svipuðum pakkningum, en hönnun umbúðanna og leturgerð er mjög svipuð og hjá Icelandic. Þá kemur orðið „saucy" einnig greinilega fyrir á umbúðum Aldi-pakkninganna. Magnús Bjarnason, forstjóri Icelandic, segir í samtali við Morgunblaðið í dag að því fylgi áhætta að fara í dómsmál, sérstaklega við jafn öflugt fyrirtæki og Aldi. Ákvörðunin hafi verið tekin að vel ígrunduðu máli, þar sem Aldi er greinilega að afrita hugverk markaðsdeildar Icelandic.