Hreyfiseðlar gegn lífstílssjúkdómum
Hreyfiseðlar eru að ryðja sér til rúms hér á landi og hafa komið í stað hefðbundinna lyfseðla í sumum tilfellum. Fimm heilsugæslustöðvar á höfuðborgarsvæðinu taka nú þátt í tilraunaverkefni þar sem læknar skrifa upp á hreyfingu fyrir sjúklinga.
Slíkt hefur gefist vel erlendis til dæmis í baráttunni við ýmsa lífsstílssjúkdóma. Sjúkraþjálfari setur upp æfingaáætlun og fylgist með því að sjúklingurinn sinni meðferðinni.
Hreyfiseðlar hafa gefið góða raun í Svíþjóð en eru nýir af nálinni hér á landi. Þeir virka eins og lyfseðlar, það er að segja, læknar ávísa þeim - en í staðinn fyrir að fara í apótekið eftir læknisheimsóknina er pantaður tími hjá sjúkraþjálfara. „Við ræðum saman og ég set upp markmið í samræmi við einstaklinginn, um það hvernig hann getur nýtt sér hreyfingu sem meðferð við sínu vandamáli. Í framhaldinu fer fólk og hreyfir sig og ég fylgi því svo eftir,“ segir Héðinn Jónsson, sjúkraþjálfari hjá Styrk. „Það getur gert það í stöku tilfellum,“ segir hann aðspurður hvort þetta komi í staðinn fyrir lyf. „Þetta getur verið meðferð meðfram lyfjum og jafnvel dregið úr notkun lyfjanna.“
Markviss hreyfing gagnast ekki síst þeim sem glíma við lífsstílssjúkdóma eins og of háan blóðþrýsting og sykursýki tvö. Hreyfiseðlum er einnig ávísað til fólks sem glímir við vægt þunglyndi og kvíða. „Okkar ósk er að hreyfiseðill verði fullgilt úrræði í heilbrigðisþjónustu á Íslandi,“ segir Héðinn.
Sigurður Björgvinsson greindist með sykursýki tvö fyrir nokkru síðan og var með asma fyrir. Hann fékk hreyfiseðil og stundar nú lyftingar og göngu reglulega - og er laus við sykursýkilyfin. „Þetta hefur bara gengið mjög vel. Þetta er þá þannig, að ef ég missi eitthvað úr þá er Héðinn kominn í símann og hringir í mig og veitir þrýsting og jákvæða kvatningu. Þannig virkar þetta.“
Ertu með athugasemd vegna fréttarinnar? Sendu á frettir@ruv.is
