Halldóra hlýtur bókmenntaverðlaun ESB

Bókmenntir
 · 
Halldóra K. Thoroddsen
 · 
Menningarefni
Mynd með færslu
 Mynd: EUPL

Halldóra hlýtur bókmenntaverðlaun ESB

Bókmenntir
 · 
Halldóra K. Thoroddsen
 · 
Menningarefni
Mynd með færslu
21.04.2017 - 11:09.Davíð Kjartan Gestsson
Halldóra K. Thoroddsen rithöfundur hlýtur Bókmenntaverðlaun Evrópusambandsins í ár fyrir skáldsögu sína Tvöfalt gler.

Í bókinni leitar Halldóra á nýjar slóðir bæði í efnistökum og stíl, segir í tilkynningu. „Í henni veiti hún meðal annars innsýn í viðfangsefni sem sjaldan er fjallað um í íslenskum bókmenntum, ástarlíf eldra fólks. Bókin veltir upp áhugaverðri spurningu sem sjaldan er orðuð: Hvenær erum við of gömul til að verða ástfangin? Annað mikilvægt efni bókarinnar er rofið milli kynslóða. En Tvöfalt gler fjallar öðrum þræði um hvernig kynslóðirnar hafa einangrast hver frá annarri og bernskan og ellin orðið út undan í samfélaginu.“

Þar segir einnig að í myndheimi bókarinnar sé fléttað saman beittu innsæi og tilfinningaþrungnum lýsingum. 

„Höfundi tekst einkar vel að fanga stórar tilfinningar í ljóðrænum og nákvæmum lýsingum, hvert orð er gaumgæfilega valið út frá merkingu og formi,“ segir í umsögn dómnefndar: „Tvöfalt gler er stór saga sögð í fáum orðum. Hún fjallar um tilvist okkar og tilgang, er barmafull af kvenlegri visku og skarpri innsýn í líf og dauða.“

Halldóra hlaut einnig Fjöruverðlaunin, bókmenntaverðlaun kvenna, fyrir bókina. Bókaútgáfan Sæmundur á Selfossi gefur hana út, en áður kom hún út í tímaritaröðinni 1005.

Bókmenntaverðlaun Evrópusambandsins eru veitt ríkjum sem taka þátt í Creative Europe, menningaráætlun Evrópusambandsins. Þeim er ætlað að hampa framúrskarandi hæfileikafólki sem er að þreifa sig áfram á bókmenntavellinum, 12 höfundum á ári hverju. Auk Halldóru var Dagur Hjartarson meðal tilnefndra höfunda í ár. Áður hafa Ófeigur Sigurðsson og Oddný Eir Ævarsdóttir hlotið verðlaunin fyrir Íslands hönd.

Tibor Navracsics, framkvæmdastjóri Evrópusambandsins í menningar- og menntamálum, afhendir verðlaunin við hátíðlega athöfn í Brussel 23. maí.

Tengdar fréttir

Menningarefni

Halldóra, Hildur og Þórunn verðlaunaðar