Hafa varla efni á fasteignagjöldum

Arna Rúnarsdóttir, tamningakona í Reykjavík fékk í gær álagningarseðil fyrir fasteignagjöld ársins af sextán hesta hesthúsi sínu. Fyrsti seðill af níu hljóðar upp á rúmlega 93 þúsund krónur. Heildargreiðsla ársins er því upp á um níu hundruð þúsund.

„Maður vinnur ekki fyrir þessu. Þetta er áhugamál hjá fólki og þetta er fáránlegt. Ég sé ekki fram á að eiga peninga fyrir þessu,“ segir Arna.

Álagningaprósentan í Reykjavík hækkaði úr rúmlega 0.2 prósentum í 1.6 prósent um áramót. Borgarráð samþykkti hækkunina eftir að borgarlögmaður hafði komist að þeirri niðurstöðu að það væri nauðsynlegt svo borgin bryti ekki lög. Sá úrskurður byggir á árs gömlum úrskurði yfirfasteignamatsnefndar. Dæmi eru um að menn þurfi að borga 600 prósent meira í fasteignagjöld í ár en í fyrra. Hestamenn sem fréttastofa hefur talað við eru sammála um að hafa bara ein áhrif. Færri geti verið í hestamennsku en áður

Þó svo að há fasteignagjöld séu lögð á í þéttbýli þurfa þeir sem búa í dreifbýli ekki að hafa áhyggjur - óumdeilt er að gjöldin þar eigi ekki að vera svo há. Landssamband hestamannafélaga hefur það mál nú til skoðunar. „Að félagasamtök þurfi að fara í mál við ríkið til að fá svona óréttlæti hnekkt, það er hálf óskiljanlegt,“ segir Haraldur Þórarinsson, formaður sambandsins. Svo virðist hins vegar sem menn hafi ekki annan kost. 

Í kvöld sendi Reykjavíkurborg frá sér yfirlýsingu um að farið hafi verið fram á að Alþingi breyti lögum, þannig að hægt verði að lækka á ný fasteignagjöld af hesthúsum þar sem ekki er rekin atvinnustarfsemi. 

Ertu með athugasemd vegna fréttarinnar? Sendu á frettir@ruv.is