Gos gæti valdið miklum röskunum
Náið er fylgst með Krýsuvíkureldstöðinni, en ekkert bendir til þess að gos sé í aðsigi eins og er.
Krýsuvíkureldstöðin er sú eldstöð sem næst stendur höfuðborgarsvæðinu og sú sem mest áhrif gefði þar ef til goss kæmi. Þá gætu orðið miklar raskanir á samgönguæðum, raflögnum og heita og kaldavatnslögnum. Um þetta fjölluðu jarðfræðingarnir Kristján Jónasson og Sigmundur Einarsson í erindi hjá Náttúrufræðistofnun í gær. Eldstöðvakerfið, sem oftast er kennt við Krýsuvík, einkennist af um 50 km langri sprungurein sem teygir sig frá sjó við Grindavík norðaustur yfir Reykjanesskaga um Móhálsadal og Undirhlíðar, Kaldárbotna og Elliðavatn, allt að Reykjum í Mosfellssveit. Norðaustantil er sprungureinin aðeins 2-4 km á breidd en suður við sjó er breidd þess allt að 10 km.
Sprungureininni fylgir mjórri gosrein sem er um 30 km löng og nær hún einnig frá sjó í suðvestri og teygir sig allt til Búrfells og Helgafells ofan við Hafnarfjörð. Síðast gaus í Krýsuvíkurkerfinu á 12. öld. Þá runnu hraun til sjávar bæði á suður- og norðurströnd Reykjanesskaga. Hin upprunalega Krýsuvík fylltist af hrauni og Kapelluhraun rann til sjávar við Straumsvík. Jafnframt urðu hreyfingar á sprungukerfinu sem liggur sunnan við höfuðborgarsvæðið.
Ertu með athugasemd vegna fréttarinnar? Sendu á frettir@ruv.is
