Góð byrjun í Norðurá
Fyrst birt: 05.06.2012 20:16, Síðast uppfært: 06.06.2012 09:24
Flokkar: Innlent, Norðurland
Það tók ekki nema átta mínútur að krækja í fyrsta laxinn úr Norðurá þetta sumarið. Laxveiðitímabilið hófst klukkan sjö í morgun og byrjunin var býsna fjörleg.
Það var formaður Stangveiðifélagsins sem krækti í fyrsta laxinn átta mínútur yfir sjö og ellefu mínútum síðar var hann kominn að landi. Klukkutíma eftir að Bjarni náði sínum laxi við Laxfoss náðust tveir aðrir, annar þeirra á sama stað.
Á hádegi voru laxarnir orðnir átta sem telst alls ekki slæm byrjun á veiðisumrinu.
Ertu með athugasemd vegna fréttarinnar? Sendu á frettir@ruv.is
