Frumkvöðlamiðstöðin Frumbjörg formlega opnuð

01.03.2016 - 15:09
Mynd með færslu
 Mynd: Árni Þorleifsson  -  Frumbjörg
Formleg opnunarathöfn fór fram í húsakynnum Frumbjargar í gær að viðstöddum fjölda boðsgesta. Frumbjörg er frumkvöðlamiðstöð Sjálfsbjargar og er nýtt úrræði þar sem jafnt fatlaðir sem ófatlaðir geta unnið að verkefnum á sviði velferðar- eða heilbrigðismála með sérstaka áherslu á hreyfihamlaða og aðra fatlaða.

Samkvæmt heimasíðu þeirra er eitt meginmarkmiðið að styðja fatlaða einstaklinga í því að skapa sín eigin atvinnutækifæri. Aðstandendur verkefnisins segja að fatlaðir hafi oft litla aðstöðu eða leiðsögn til að vinna að sínum hugðar- og hagsmunaefnum. Frumbjörg sé í takt við nýja hugsun um aðgengi og aðstöðu fatlaðra til virkrar þáttöku.

Iðnaðar- og viðskiptaráðherra og heilbrigðisráðherra opnuðu aðstöðuna formlega. Þá kom borgarstjóri Reykjavíkur og færði Frumbjörg blómvönd. Þeir þremenningar færðu heillakveðjur og buðu mikið og gott samstarf. 

 

Gunnar Hrafn Jónsson
Fréttastofa RÚV