Ferðamaðurinn stóð upp á steini í Reynisfjöru

10.02.2016 - 20:00
Mynd með færslu
 Mynd: Lögreglan á Suðurlandi
Rannsókn lögreglunnar á Suðurlandi hefur leitt í ljós að kínverskur ferðamaður, sem lést eftir að alda hreif hann út á sjó úr Reynisfjöru í dag, stóð á sjálfstætt standandi hálfs metra stuðlabergssteini. Lögreglan hefur sent frá sér mynd af steininum.

Steinninn, sem maðurinn stóð upp á við myndatökur, er í nokkurra metra fjarlægð frá stuðlaberginu í Reynisfjalli. Samkvæmt frétt á vefsíðu lögreglunnar braut þá úthafsalda þá á steininum og greip manninn sem sogaðist út með henni um 550 metra frá landi og drukknaði. 

Það var í morgun, klukkan 10:39, að tilkynning barst Neyðarlínu um að maður hefði fallið í sjóinn við Reynisfjöru í Mýrdal. Lögregla, björgunarsveitir og sjúkraflutningamenn fóru þegar á vettvang og náðist maðurinn um borð í bát björgunarsveitar en lífgunartilraunir báru ekki árangur og var maðurinn úrskurðaður látinn á vettvangi. Hann var Kínverskur ríkisborgari , fæddur 1976, ferðamaður hér á landi ásamt eiginkonu sinni.


Deila frétt



10.02.2016 - 20:00