Erlingur ráðinn yfirþjálfari ÍBV
Erlingur við undirskriftina á lokahófi ÍBV í gærkvöldi.
Erlingur Richardsson, annar þjálfara Íslandsmeistara HK í handbolta er á förum til ÍBV þar sem hann hefur verið ráðinn yfirþjálfari handknattleiksdeildar og annar aðalþjálfara karlaliðs ÍBV.
Erlingur sem skrifaði undir 2 ára samning þess efnis á lokahófi handknattleiksdeildar ÍBV í gærkvöldi verður einnig þjálfari karlaliðs ÍBV við hlið Arnars Péturssonar. Erlingur verður forstöðumaður íþróttaakademíu ÍBV en hún er í samstarfi við grunn- og framhaldsskóla Vestmannaeyja. Þá verður hann jafnframt yfirþjálfari allra yngri flokka ÍBV og yfirmaður allrar styrktarþjálfunar hjá félaginu, í handbolta og fótbolta
Erlingur er uppalinn Eyjamaður og var leikmaður ÍBV sem varð bikarmeistari árið 1991 en það er eini titillinn sem karlalið ÍBV í handbolta hefur unnið.
Erlingur er íþróttafræðingur að mennt og starfar sem kennari í íþróttafræði við Háskólann í Reykjavík.
Ertu með athugasemd vegna fréttarinnar? Sendu á frettir@ruv.is
