Endurheimt skóglendi eykur afköst

04.02.2016 - 04:26
epa03687172 An aerial view shows deforestation in the Tesso Nilo National Park, Riau province, Indonesia, 04 May 2013. According to Greenpeace, the forest inside the national park should be legally protected, and calls the Indonesian government to be more
Skógum eytt í Indónesíu til þess að koma fyrir pálmaolíu-plantekru.  Mynd: EPA
Tré hitabeltisskóga sem vaxa á ný á beitilandi eða á landi sem búið hefur verið undir jarðrækt með skógarhöggi bæði vaxa mjög hratt og taka til sín miklu meiri koltvísýring en tré eldri skóga. Frá þessu er greint í niðurstöðum rannsóknar í nýjasta tímariti vísindaritsins Nature.

Á aðeins tveimur áratugum náðu nýir hitabeltisskógar í Suður-Ameríku að byggja upp 120 tonna lífmassa á hektara, auk þess sem þeir tóku þrjú tonn af koltvísýringi á hektara úr andrúmsloftinu á hverju ári. Það er ellefufalt á við koltvísýrings-upptöku eldri skóga að sögn vísindamannanna á bak við rannsóknina.

Fjöldi vísindamanna fylgdist með vexti trjáa á um 1.500 jarðskikum og 45 svæðum víða í Suður-Ameríku. Gögnin notuðu þeir til þess að reikna út mögulega uppbyggingu lífmassa eftir svæðum. Að sögn vísindamannanna geta stjórnvöld nýtt þær upplýsingar til þess að merkja þau svæði sem ákjósanlegt er að vernda fyrir skógarhöggi.

Skógar eru helsta vörn mannkyns gegn loftslagsbreytingum. Þeir soga til sín um 30 prósent alls koltvísýrings sem menn senda í andrúmsloftið. 
Skógarhögg hefur tvöföld áhrif á losun koltvísýrings. Bæði losnar koltvísýringurinn sem tréin geyma þegar þau eru felld, og færri tré eru til þess að taka við honum. Um fimmtungur alls skóglendis Amazon regnskógarins, þeim stærsta í heiminum, hefur orðið skógarhöggi að bráð.

Yfir helmingur frumskóga heimsins er nýlega endursprottinn á svæðum þar sem tré voru felld til þess að koma að beitilandi og jarðrækt.

 


Deila frétt



Róbert Jóhannsson
Fréttastofa RÚV
04.02.2016 - 04:26