Borgin ber ábyrgð en þarf ekki að borga

Innlent
 · 
Tónlist
Mynd með færslu
 Mynd: Shutterstock

Borgin ber ábyrgð en þarf ekki að borga

Innlent
 · 
Tónlist
Mynd með færslu
10.03.2016 - 11:53.Hallgrímur Indriðason
Reykjavíkurborg ber ábyrgð á tónlistarkennslu en hafði rétt á því að fella niður fjárframlög til slíkrar kennslu á framhaldsstigi, samkvæmt dómi í máli Tónlistarskólans í Reykjavík gegn borginni. Skólinn ætlar að áfrýja niðurstöðunni.

Tónlistarskólinn höfðaði mál þar sem þess var krafist að Reykjavíkurborg greiddi honum það sem upp á vantaði til að greiða kennslukostnað fyrir nemendur á framhaldsstigi ásamt söngnemum á miðstigi.  Samkomulag sem ríkið og sveitarfélög gerðu árið 2011 var um að efla það nám með fjárframlögum frá ríkinu.

Í framhaldi af því ákvað Reykjavíkurborg að fella niður greiðslur til þess náms umfram framlag ríkisins. Það varð til þess að á þremur skólaárum, frá 2011-2014, var rekstrarhalli skólans rúmlega 41 milljón.

Reykjavíkurborg hafnaði kröfu Tónlistarskólans á þeim forsendum að sveitarfélög ráði sjálf málefnum sínum samkvæmt lögum og ráði sjálf eigin tekjustofnum. Í lögum um fjárhagslegan stuðning við tónlistarskóla sé ekki lögð skylda á sveitarfélög að bjóða upp á tónlistarnám. 

Í dómnum, sem féll í nóvember en hefur ekki verið birtur á vef Héraðsdóms, er vísað í sömu lög, þar sem er kveðið á um að sveitarfélög greiði laun skólastjóra og kennara í tónlistarskólum. Fallist er á að sú ákvörðun borgarinnar, að leggja ekkert í tónlistarkennslu á framhaldsstigi umfram framlag ríkisins, væri ekki í samræmi við þau lög.

Hins vegar er fallist á það að borgin ráði sjálf málefnum sínum og hún sé ekki skyldug samkvæmt lögum til að veita fjármunum til tónlistarskóla. 

Þórunn Guðmundsdóttir aðstoðarskólastjóri Tónlistarskólans í Reykjavík segir að dómnum hafi verið áfrýjað til Hæstaréttar. Hún segir að þeirri spurningu sé ósvarað hvernig sveitarfélag, eins og Reykjavíkurborg, geti borið ábyrgð á tónlistarnámi en á sama tíma hætt að tryggja að fullu fjármagn í hana.

Tengdar fréttir

Tónlist

Stutt í samning um tónlistarkennslu