Bág staða kvenna í sauðfjárrækt

17.02.2016 - 21:10
Mynd með færslu
 Mynd: ruv
Staða kvenna í sauðfjárrækt er mjög bág að mati Rannsóknarstofnunar jafréttisfræða HÍ. Þær eru sjaldan skráðar fyrir búum, vinna þeirra mikil en oftast ólaunuð og ósýnileg í opinberum gögnum. Þá afli karlarnir sér meiri lífeyrisréttinda og styrkja svo fátt eitt sé nefnt.

Konur eru einungis skráðar fyrir fjórðungi býla í landinu og 83% handhafa beingreiðslna í sauðfjárrækt eru karlar. Þetta er meðal þess sem kemur fram í úttekt sem Landssamtök sauðfjárbænda létu gera.

Kristín Ingibjörg Pálsdóttir, verkefnastjóri hjá Rannsóknarstofnun í jafnréttisfræðum við Háskóla Íslands, segir að vinna kvennanna sé óskráð, eignirnar séu ekki skráðar á þær. Það komi niður á lífeyrisréttindum þeirra og öðrum réttindum svo að þær hafi ekki sama aðgang að lánsfé og karlarnir svo dæmi sé tekið. Mikilvægt sé að rétta hlut kvenna í greininni sem fyrst.

Mikilvægast sé að atvinnuvega- og nýsköpunarráðuneytið endurskoði relgur um skráningu búa og eigna í landbúnaði og tryggi þar jafnan rétt karla og kvenna.

Sennilegast sé um að ræða leifar af gamla kerfinu þar sem að konan vann heimilisstörfin sem ekki voru skráð sem vinna og karlinn vann útivinnuna sem talin var vera vinna. Kerfið hafi ekki fylgt þróuninni.

 

 


Deila frétt



Mynd með færslu
María Sigrún Hilmarsdóttir
Fréttastofa RÚV
17.02.2016 - 21:10