Aronofsky og Björk saman í náttúruvernd

Mynd: Rúv/Björn Malmquist


  • Prenta
  • Senda frétt

Bandaríski leikstjórinn Darren Aronofsky og söngkonan Björk ætla að styðja tvenn íslensk náttúruverndarsamtök. Aronofsky gefur ágóða af miðasölu á frumsýningu myndar sinnar, Noah, sem tekin var hér á landi, en Björk kemur fram á stórtónleikum með Patti Smith og fleirum. Viðburðirnir verða 18. mars.

Þetta var tilkynnt á blaðamannafundi í Hörpu síðdegis, en tónleikarnir verða haldnir þar. Átakið hefur fengið nafnið Stopp - gætum garðsins, og er samvinnuverkefni Aronofskys, Bjarkar, Landverndar og Náttúrverndarsamtaka Íslands. Allir listamenn sem koma að verkefninu gefa vinnu sína. 

Þeir tónlistarmenn sem koma fram í Hörpu eru Highlands, Patti Smith, Of Monsters and Men, Samaris, Björk, Mammút og Likke Li. 

Yfirlýsing frá Stopp - Gætum garðsins fylgdi fréttatilkynningu um viðburðina. Þar eru meðal annars settar fram kröfur um að Þjórsárver, víðernin vestan Þjórsár og fossarnir í Þjórsá verði verndaðir til allrar framtíðar. Varað er við áformum um virkjun jarðvarma við Mývatn, þess krafist að allar nýjar jarðlínur á Reykjanesi verði lagðar í jörð. Sérstaklega er mótmælt því sem samtökin kalla aðför að náttúruverndarfólki vegna mótmæla í Gálgahrauni, og þess er krafist að frumvarp til laga um brotfall nýrra náttúruverndarlaga verði dregið til baka, og ný lög taki gildi 1. apríl, eins og lögin kveða á um.

Ertu með athugasemd vegna fréttarinnar? Sendu á frettir@ruv.is

Tilkynna um bilaða upptöku