Aðeins helmingurinn mætir í leit

Á hverju ári greinast um 60 þúsund konur í Evrópu með leghálskrabbamein. Íslendingar eiga því láni að fagna að hér á landi er dánartíðni af völdum þessa sjúkdóms einna lægst á heimsvísu. Skipulagðri leit er þar helst að þakka. Aðrir þjóðir, innan Evrópu, geta ekki státað af viðlíka árangri.

Yfirlæknir á Leitarstöð Krabbameinsfélagsins segir árangur af leitarstarfi ótvíræðan. En dánartíðni vegna sjúkdómsins hefur lækkað um rúm 90% frá því að skipulagt leitarstarf hófst. Hann segir þó áhyggjuefni að konur mæti nú síðar til leitar.

„Það sást nú vel hér upp úr 1980. Þegar mætingin var mjög léleg þá hækkaði skyndilega tíðni leghálskrabbameina. Og við settum í gang þá aðgerðir til að tryggja betri mætingu. Hún jókst upp í 82% 1990 en hefur síðan verið að dala,“ segir Kristján Sigurðsson, yfirlæknir á Leitarstöð Krabbameinsfélagsins.
Mætingin hefur minnkað um rúm 10% á undanförnum árum hjá eldri aldurshópnum, það er að segja hjá konum 25-69 ára.

„Mætingin hefur verið lélegri hjá yngstu kynslóðinni 20-24 ára. Þar er mætingin ekki nema 50%,“ segir Kristján. Þetta sé áhyggjuefni þar sem mæting sé undirstaða fyrir góðum árangri í baráttu við sjúkdóminn.

„En núna á síðustu tveimur árum hefur orðið vaxandi tíðni krabbameins aftur í leghálsi sem stafar af því að konur eru ekki að mæta nógu vel. Það er að segja þessi tíðni er meðal þeirra sem að mæta illa eða hafa aldrei mætt til leitar, því miður,“ segir Kristján.

Ertu með athugasemd vegna fréttarinnar? Sendu á frettir@ruv.is