Víðsjá

Hjarta Reykjavíkur, Helgi Þorgils, fataauglýsingar, Egla

Í Víðsjá í dag verður meðal annars rætt við Helga Þorgils Friðjónsson myndlistarmann um sýningu sem stendur yfir í Galleríi Göngum við Háteigskirkju í Reykjavík. Sýningin ber yfirskriftina 14 stöðvar, sjálfsmynd sem .... en þar sýnir Helgi fjórtán olíumálverk sem hann hefur unnið á síðustu sex árum og endurspegla hinar fjórtán stöðvar frá því Kristur var dæmdur til dauða, leið hans með krossinn Golgata, þar til hann var krossfestur, dáinn og grafinn. Í verkunum kallast Helgi á við mörg þekkt verk úr listasögunni, bæði vel þekkt og minna þekkt. Verslunin Hjarta Reykjavíkur við Laugarveg verður heimsótt og þar rætt við Ragnhildi Jóhanns myndlistarkonu um sýningu hennar Meðan blóðið er heitt sem var opnuð um nýliðna helgi. Það er ekki á hverjum degi sem fataauglýsingar fjalla um kynþáttafordóma, kyn, kyngervi og líf handan tvíhyggjunnar, en nýjasta afurð ítalska tískuhússins Gucci gerir einmitt það. Samstarf listræns stjórnanda Gucci, Alessandro Michele og bandaríska leikstjórans GUs Van Sant hefur vakið athygli. Halla Harðardóttir kynnti sér málið og við fáum heyra betur af því í þætti dagsins. Og kvöldsagan á Rás 1 um þessar mundir er Egils saga, Víðsjá fylgist með lestrinum og skoðar söguna frá ýmsum sjónarhornum, í dag ræðir Torfi Tulinius um ráðgátuna Egil Skallagrímsson, persónueinkenni hans og fleira.

Umsjón: Guðni Tómasson og Eiríkur Guðmundsson

Birt

19. jan. 2021

Aðgengilegt til

19. jan. 2022
Víðsjá

Víðsjá

Þáttur fyrir áhugafólk um listir og menningu. Ljósi varpað á það sem efst er á baugi hverju sinni, menningin nær og fjær skoðuð frá ólíkum sjónarhornum og skapandi miðlar settir undir smásjána.