• 00:07:38Unnur Birna - fæðingarótti
  • 00:24:22Kristinn Sæmundss - Iðnaðarhampur
  • 00:37:51Hildur Helgad. - sóttvarnir á Heilsuvaktinni

Mannlegi þátturinn

Unnur Birna, iðnaðarhampur og sóttvarnir á Heilsuvaktinni

Við fjölluðum ítarlega um tókófóbíu, eða fæðingarótta, fyrr í vetur og ræddum við Unni Birnu Björnsdóttur tónlistarkonu sem hefur verið haldin þessari fóbíu undanfarin ár en tókófóbía er sjúkleg hræðsla við þungun og fæðingu og getur leitt til þess að kona sleppir alfarið barneignum eða frestar því í lengstu lög. Þegar við ræddum við Unni átti hún fáeinar vikur eftir af sinni fyrstu meðgöngu og útskýrði á einlægan hátt hversu íþyngjandi þessi fóbía hefur verið henni og hversu mikinn stuðning hún hafi fengið frá öðrum konum í svipaðri stöðu. Nú er Unnur búin að eiga litla stúlku og við fengum að vita í þættinum í dag hvernig þetta gekk allt saman og hvernig gengur í dag.

Síðasta vor var reglugerð breytt tímabundið svo leyfilegt var að rækta iðnaðarhamp á Íslandi, háð skilyrðum og takmörkunum svo tryggt sé að ekki verði fluttar inn eða ræktaðar plöntur sem innihalda vímuefnið THC í nýtanlegu magni, eða að hámarki 0,2%. Einhverjir hófust strax handa og nýttu síðasta sumar í tilraunaræktun, enda er hægt að nýta iðnaðarhamp í margvíslegum tilgangi. Það sem hægt er að gera úr honum eru meðal annars trefjaplötur, steypa, pappír, eldsneyti og textíll. Eins matvæli, fæðubótarefni, skepnufóður og lyf. Kristinn Sæmundsson er einn þeirra sem fór af stað síðasta vor og uppskera sumarsins var að hans sögn nokkuð góð. Við ætlum að fá Kristinn til þess að segja okkur aðeins frá sinni reynslu af þessari ræktun og hvernig hann sér þetta fyrir sér hér á eftir.

Í guðanna bænum ekki byrja að knúsast aftur segir Hildur Helgadóttir hjúkrunarfræðingur sem á sæti í farsóttarnefnd Landspítalans. Bergljót Baldursdóttir ræddi við hana á heilsuvaktinni í dag um hvaða lærdóm um sóttvarnir við getum dregið af heimsfaraldrinum. Mun minna er af sýkingum af ýmsu tagi núna á meðan fólk heldur uppi ströngum sóttvörnum.

UMSJÓN GUNNAR HANSSON OG GUÐRÚN GUNNARSDÓTTIR?

Birt

13. jan. 2021

Aðgengilegt til

13. jan. 2022
Mannlegi þátturinn

Mannlegi þátturinn

Um litróf mannlífsins.

Umsjón: Guðrún Gunnarsdóttir og Gunnar Hansson.

Þættir