Mannlegi þátturinn

Nýtt útvarpsleikrit, Sigvaldi og jólakveðjurnar og Ragnar Torfason

Með tík á heiði er nýtt íslenskt útvarpsleikrit í fjórum hlutum eftir Jóhönnu Friðrikku Sæmundsdóttur, í leikstjórn Silju Hauksdóttur. Fyrsti hluti verksins verður sendur út hér á Rás 1 á aðfangadag, en verkið fléttar saman sögum tveggja kvenna á Íslandi með hundrað ára millibili. Þær Jóhanna og Silja hafa unnið saman áður, en þær skrifuðu, ásamt Göggu Jónsdóttur, kvikmyndina Agnes Joy, sem þær hlutu Edduverðlaun fyrir sem mynd ársins og fyrir besta handritið. Auk þess var kvikmyndin nýlega valin sem framlag Íslands til Óskarsverðlaunanna. Við fengum þær Jóhönnu og Silju í þáttinn í dag í spjall um kvikmyndina, útvarpsleikritið og samstarfið.

Sigvaldi Júlíusson er hlustendum Rásar 1 vel kunnugur, hann var auðvitað þulur í áratugi. Ingibjörg Fríða Helgadóttir, frá KrakkaRÚV fékk þau Vigdísi Unu Tómasdóttur, 10 ára og Kára Tuvia Ruebner Kjartansson, 9 ára, með sér í lið til að taka viðtal við Sigvalda meðal annars um jólakveðjuhefð Rásar 1, hvort það sé ekki erfitt að lesa svona mikið á einum degi, hver sé fallegasta jólakveðja sem hann hefur lesið og hver sé sú skrýtnasta? Í lokin hjálpast þau við að flytja krökkum og fjölskyldum landsins jólakveðju frá KrakkaRÚV. Við fengum að flytja viðtalið í þættinum í dag.

Ragnar Torfason er alinn upp á Finnbogastöðum í Trékyllisvík, þar tóku jólasveinar hlutverk sitt alvarlega og Ragnar hefur ásamt öðrum fetað í þeirra fótspor. Kristín Einarsdóttir, okkar kona á Ströndum, hitti Ragnar á heimili hans í Reykjavík og fékk hann til að rifja upp jólin á Ströndum.

UMSJÓN GUNNAR HANSSON OG GUÐRÚN GUNNARSDÓTTIR

Birt

22. des. 2020

Aðgengilegt til

22. des. 2021
Mannlegi þátturinn

Mannlegi þátturinn

Um litróf mannlífsins.

Umsjón: Guðrún Gunnarsdóttir og Gunnar Hansson.

Þættir