Veikt snjólag varð til þess að snjóflóð fór af stað af mannavöldum í Brimnesdal við Ólafsfjörð um helgina. Skíðaleiðsögumaður á svæðinu segir þekkingu og reynslu lykilatriði í að tryggja öryggi skíðafólks.
Það gæti skýrst í dag hvort Rafiðnaðarsambandið og Félag vélstjóra- og málmtæknimanna ganga frá kjarasamningi við Samtök atvinnulífsins fyrir hönd Orkuveitu Reykjavíkur og Landsvirkjunar. Samninganefndirnar hittast hjá ríkissáttasemjara í dag.
Hlutabréfaverð féll á helstu mörkuðum í morgun eftir yfirtöku á Credit Suisse bankanum, en lækkunin hefur að mestu gengið til baka. Fjármálaráðherra Sviss segir að gjaldþrot bankans hefði valdið miklu tjóni bæði í Sviss og á alþjóðavettvangi.
Ekki er talið að andlát karlmanns í Þingholtunum í Reykjavík í gærmorgun hafi borið að með saknæmum hætti. Tveimur mönnum var sleppt úr haldi eftir yfirheyrslu í morgun.
Ferðaþjónustufyrirtæki í Vatnajökulsþjóðgarði gætu þurft að taka á sig kostnað vegna gjaldtöku við Jökulsárlón, sem hefst í júní. Eigandi eins þeirra segir ekki inni í myndinni að rukka ferðamenn afturvirkt.
Varnar- og utanríkismálaráðherrar aðildarríkja Evrópusambandsins leggja nú lokahönd á samkomulag um að útvega stóraukið magn skotfæra fyrir hersveitir Úkraínumanna. Endanleg ákvörðun verður tekin á leiðtogafundi ESB síðar í vikunni.
Þeim fækkar sem greinast með skæðar streptókokkasýkingar. Enn er þó talsvert álag á heilsugæslustöðvum.
Þó Íslendingar skori hátt á alþjóðlegum hamingjulista eru blikur á lofti. Minnkandi hamingja mælist meðal ungs fólks.
