Umboðsmaður Alþingis telur að dómsmálaráðherra hafi gerst sekur um samráðsleysi við ákvörðun um að vopna lögreglu rafbyssum. Það hafi verið mikilvægt stjórnarmálefni, sem hefði átt að ræða í ríkisstjórn. Umboðsmaður vísar í þessu samhengi í Landsdómsmálið gegn Geir H. Haarde.
Útlit er fyrir versnandi fjármálaskilyrði, þráláta verðbólgu og að greiðslubyrði lána þyngist enn frekar, að mati fjármálastöðugleikanefndar Seðlabanka Íslands. Greiningardeildir spá tólftu stýrivaxtahækkuninni í röð í næstu viku.
Rússnesk stjórnvöld vísa því á bug að hafa grandað bandarískum dróna sem brotlenti í Svartahafi. Bandarísk stjórnvöld vilja ekki að dróninn lendi í röngum höndum.
Evrópusambandið undirbýr sendingu skotfæra fyrir um hundrað og fimmtíu milljarða króna til Úkraínu, aðallega fyrir stórskotabyssur.
Lagt er til í nýrri skýrslu að ríkið styðji við kornrækt í landinu fyrir um hálfan milljarð króna á ári, að stofnað verði kornsamlag og bændur fái heimild til veiða fugla sem valda tjóni á ökrum.
Allt bendir til þess að loðnuvertíðinni sé að ljúka. Loðnan er komin fast að hrygningu og bjartsýnustu útgerðarmenn telja um viku eftir af vertíðinni.
Ferðamenn sem létta á sér við húsvegg á Djúpavogi eru orðnir svo þrálátt vandamál að heimastjórnin ætlar að senda fyrirtækjum í húsinu formlegt erindi um að koma þurfi upp salernisaðstöðu hið fyrsta.
Hvorki Albert Guðmundsson né Birkir Bjarnason eru í íslenska landsliðshópnum í knattspyrnu sem tilkynntur var í morgun.
